طريقة هتساعدك على خسارة 4 كيلو في 10 ايام بشرب المية بس !

[marit jesus]

كلنا بنحلم بجسم رشيق ومثالي وبنقعد ندور دايما على انظمة غذائية ورجيم وتمارين عشان نخس ومش بنخلي حاجة الا لما نجربها, لكن ايه رايكم لو عرفتوا انكم ممكن تخسوا من غير رياضة ولا نظام رجيم ؟ هتخسوا بالمية بس ! ببساطة جدا الفكرة قايمة على زيادة كمية المية اليومية اللي جسمك بيحصل عليها يعني تشربي في اليوم تقريبا ما يقلش عن 2 لتر ونص مية, ولكن المشكلة بتكون ان في كتير مننا مش بيقدر يشرب كمية المية دي في اليوم او مش بنعرف ننظم الموضوع ازاي اننا نشرب الكمية دي على مدار اليوم كله, عشان كده احنا النهاردة هنقولكم على نظام شرب المية بشكل يومي اللي هيساعدك انك تخسري تقريبا 4 كيلو في 10 ايام.
تعالوا نعرف مع بعض ازاي المية هتساعدك على خسارة 4 كيلو في 10 ايام !
1- اشربي الصبح من 300 لـ 600 ملليلتر مية:
اول ما تصحي من النوم على طول اشربي من 300 لـ 600 ملليلتر مية الافضل اننا نجيب ازازة المية الصحية اللي هي قابلة لاعادة الاستخدام والازايز دي بتتباع دلوقتي في كل حتة والميزة فيها بتبقى متقسمة بالملليتر عشان تقدري تحددي بالظبط كمية المية اللي هتشربيها, امليها وخليها جنب السرير اول ما تصحي من النوم تشربي الكمية بتاعة الصبح, ممكن تزودوا للمية فاكهة او ليمون او خيار عشان تديها ناكهة وتشجعكم انكم تشربوا كمية المية كلها, وفي ازايز بتتباع بردوا بتحلل الفاكهة جواها يعني اول ما تحطي الفاكهة هتدوب في المية وممكن تلاقو منها بتتباع على النت.
2- اشربي قبل وبعد الفطار من 250 لــ 500 ملليلتر:
بعد كده الكمية التانية من المية هنشربها قبل الفطار هتشربي من 250 لــ 500 ملليلتر مية وزيهم بعد الفطار, وطبعا لو بتشربي قهوة او شاي او عصاير او اي حاجة على الفطار ده هيتحسب من كمية المية اللي بتشربيها كل كوباية قهوة او شاي فيها تقريبا من 88 لــ 236 ملليلتر مية.
3- اشربي قبل الغدا والعشا من 250 لــ 500 ملليلتر:
بعد كده هنشرب قبل وجبة الغدا ب 20 دقيقة كمية مية من 250 لــ 500 ملليلتر ونفس الطريقة والكمية قبل وجبة العشا.
4- اشربي قبل النوم من 300 لـ 600 ملليلتر:
قبل وقت النوم بتاعنا بكام ساعة هنشرب من 300 لــ 600 ملليلتر مية.
وكده لو مشينا على النظام ده هنيجي على اخر اليوم هنلاقي نفسنا مخلصين كمية المية اللي المفروض ناخدها.
– طيب ليه النظام ده بينجح في التخسيس؟
1- اول حاجة طبعا بالمقارنة مع النظم الغذائية والرجيمات الصعبة تعتبر الطريقة دي سهلة جدا ومش محتاجة مجهود ولا حرمان من الاكل وكمان المية متوفرة عندنا كلنا فمش هيبقى صعب علينا اننا نمشي على النظام ده.
2- الصبح اول ما بتشربي المية بيبدأ المخ يستخدم طاقة من الجسم عشان يساعد في عملية نظامك المائي.
3- شرب المية الكتير بيخفف العبء من على الكبد اللي هو المسئول الاول عن حرق الدهون في الجسم وتحويلها لطاقة, كمان شرب المية الكتير مهم جدا عشان الكلى تشتغل بشكل سليم.
4- لما بتشربي كمية مية قليلة ده بيحرم الكلى من السوائل اللي محتاجاها وده هيحفز الكبد انها تعوض تقصير الكلى وتقوم بدورها وكده هنقلل وظيفة الكبد اللي هي مسئولة عن حرق الدهون وبالتالي مش هتقوم بحرق الدهون بسرعة وده هيسبب في زيادة الوزن طبعا, لكن شرب مية كفاية هيحل المشكلة دي كلها وكل عضو هيقوم بدوره الطبيعي وبالتالي مش هيبقى في مشكلة والدهون هتتحرق بسرعة ومش هيبقى في زيادة وزن.
5- طبعا شرب المية الكتير هيخلينا ندخل الحمام كتير ودي هتبقى المشكلة لكن متقلقوش الموضوع في البداية بس هيكون كده وهتدخلي الحمام الكتير لكن بعد كده الجسم هيتعود وهيتظبط على كمية المية اللي بتدخله وهتلاقي نفسك بتدخلي الحمام اقل.
6- لكن الميزة بقى في الطريقة دي للتخسيس انك مش هتستني وقت طويل عشان تحسي بالنتيجة زي الانظمة الغذائية او الرجيمات لان المفروض انك هتحسي بالفرق بعد 10 ايام بس من اتباع النظام ده, ده غير انها وسيلة رخيصة ومش مكلفة بعكس الانظمة الغذائية اللي بتحتاج ميزانية وكمان تغيير اسلوب حياتنا ونظامنا الغذائي كله.