جرب البساطة و دور على السعادة اللي طالعة من جواك

[walaa farouk]

قوم معايا كده و بص حواليك في بيتك و دولابك و حتى تلاجتك 😅
هتلاقي فيه خير أشكر ربنا عليه أولاً
لكن جرب تفكر بطريقة مختلفة كده بص للي حواليك بص للناس اللي مش عندهم نفس إمكانياتك هتلاقيهم برضه مبسوطين بالعيد برغم الظروف الصعبة لأن ببساطة الموضوع مش واقف على البهرجة و الإمكانيات و الممتلكات و شكل الإحتفالات الضخمة ولا حتى المظهر والشكل المتكلف
يمكن كل واحد فيه حاجات بتبسطه و بيحب يحتفل بطريقة معينة
لكن يسوع لما اتولد كان في مزود بسيط وعاش حياة بسيطة
وغيره ناس كتير مننا الإحتفال بالعيد بالنسبالهم مجرد اللمة الحلوة
و الضحكة اللي من القلب و الراحة بعد وقت إجهاد وراحة البال
و الضمير و الشعور بالأمان و المحبة مع اللي حواليك
فكّر كده تجرب البساطة دي
البساطة اللي يمكن بتتنازل فيها عن المكان الغالي أوي
اللي بتحتفل فيه أو كل بهرجة أو زينة متكلفة
و تتخلّى عن الحاجات الزايدة و تقلل من أسلوب الإستهلاك
وخلاص لمجرد إنك معتقد إن السعادة في الحاجة الأغلى أو الأعلى
جرب البساطة و دور على السعادة اللي طالعة من جواك مش الحاجات اللي من بره
ساعتها هتكتشف فرحة جديدة فرحة مش متوقفة على حاجات لكن عليك إنت وبس

#عيد_ميلاد_ملكنا🌲
#تغيروا