هو أنا كبرت بجد ولا ايه

[walaa farouk]

كبرت شوية..

بقيت مُتدين اقل، بس انسان أكتر..

يمكن مابطلتش اغلط، بس بقيت شايف نفسي وعارف اقراها صح..

مبقتش انسب لربنا أو للقدر أو الظروف اخطائي وقراراتي زي زمان..
زي ماتقول بقيت شايل شيلتي.

بطلت العب دور الضحية ولو انه مُريح ومفهوش مسئوليات..
بس اتعلمت اكبر و اخُد حياتي بجد.

يمكن حواراتي وصراعاتي الداخلية لسا مُشتعلة ولسا مانتهتش.
. بس دوشة برا وهدر طاقتي على كل كبيرة وصغيرة
هو اللي انتهى بقرار واعي مني.

يمكن قناعاتي ورؤيتي للدنيا اتغيرت اسرع واجرأ مما تخيلت،
بس لسا مقرر اكتشف الحياة واكتشفني
ومافضلش واقف في نفس النقطة كتير.

يمكن الناس قلِت، والزحمة خفِت، والمشهد ضاق عليا زيادة..
بس ده طريقي، وانا مقرر امشيه للآخر.

مبقتش احُط توقعات وتصورات للي جاي؛
لاني اتعلمت من اللي فات أن الواقع والوقت ليهم
رأيهم اللي هايمشي رغماً عن طموحاتي الساذجة..

مبمسكش في الناس للآخر، مبعلقش امال على اي حد أو اي وضع
مهما كان ثابت أو مُستقر دلوقتي،
اصلي اتعلمت ان في لحظة ممكن كل شئ (وكُل شئ حرفياً)
يختفي ولا كأنه كان موجود..

يا الله..
هو أنا كبرت بجد ولا ايه..

[الوردة الذهبية]

يعطيك العافية