كبرت يا أمى .....

Rena Jesus · رقم المشاركة : ( 1 ) 31 - 05 - 2017, 09:21 AM

كبرت يا أمى
و عرفت ان الفرخة بتتقطع 8 للكبسة و 4 للشوى

كبرت يا أمى
و عرفت قيمة البانيه و الشيش اللى متبلين فى الفريزر

كبرت يا أمى
وعرفت ان اسمو ورق لورا مش ورق شجر

كبرت يا أمى
وعرفت الفرق بين التوم البودر و البصل البودر

كبرت يا أمى
و عرفت ان البسبوسة روحها السمنة و الكيكة ميتفتحش عليها فى الفرن

كبرت يا أمى
و عرفت الفرق بين الموزة و الكندوز و البتلو

كبرت يا أمى
و عرفت ان البشاميل مواعينه كتيرة و الرز لازم يتوطا عليه

كبرت يا أمى
و عرفت ان الخلاط لازم يتلمع قبل ما يتشال و كوبيات العصير و لبن يتحط فيها مايه لحد ما تتغسل

كبرت يا أمى
و عرفت ان تشطيب المطبخ حوض و بوتجاز و ارضية مش حوض بس

كبرت يا أمى
و عرفت ان شكل المعجون فى الحوض بعد غسيل السنان بيعصب

كبرت يا امى
عرفت ان الفوطة لما بتتحط مبلولة على السرير بتعلى الضغط

كبرت يا أمى
و عرفت ان القعدة على الصالون بتقطع القلب و خصوصا لو اللى قاعد ماسك كوبايية بيبسى

كبرت يا أمى
و عرفت ان الحبل لازم يتنفض و يتلمع قبل ما الغسيل يتنشر

كبرت يا أمى
و عرفت ان الاكل على سرير و الكوباية المركونة على الكمود بيحرقوا الدم

كبرت يا أمى
و عرفت قيمة عروض كارفور و اولاد رجب و بفرح باليفة الهدية بتاعت بريل

كبرت يا أمى
و حسيت يعنى ايه حمل و ولادة و خوف على الضنى

كبرت يا أمى
و عرفت يعنى ايه مقدرش اسيب بيتى ولا سريرى

كبرت يا أمى
و كل اللى عملته فيكى بشوفه بعينى

كبرت يا أمى
و عرفت انتى تعبتى قد ايه .......