مثل عبقري للي بيرمي مجهوده في الهواء ، بيحرث في البحر و بينفخ في قربة مقطوعة !!
فيه مناقشات اخرها زي اولها ، مش ح ينوبك منها غير الصداع قطع النفس و ووجع القلب !!
و الموضوع علي فكرة بيبقي باين من أوله : مقاطعة و منطق معوج و مناقشة عقيمة ، و يا ح تخلص زي ما هو عاوز ، يا ح تقلب قلة قيمة و قلة احترام و قلة أدب!!
و فيه ناس كده برضه ، عشرتها ما تلذش، خساير ورا خساير ، تجربها مرة و اتنين و تديها فرصة ورا التانية تلاقي مرة ما لهاش طعم ، و مرة تلاقيها مرار علي دمار ..
طيب و علي ايه وجع القلب ده ؟؟ و ليه كمية الوقت علي المشاعر علي الخساير اللي بتحصل ؟؟
خليك واعي : المناقشات دي بلاش منها ؛ قول رأيك مرة او اتنين ، لقيت ماحدش سامعك يبقي وفر مشاعرك للمواضيع اللي تستاهل ..
و الناس اللي بتاكل وقتك و راحتك و سلامك ، بعد ما تكتشفها ، سطح علاقتك بيها بذكاء و حكمة ، و قلل احتكاكك بيها تقلل خلافاتك و تشتري عمرك و صحتك !!
02 - 05 - 2022, 08:11 AM
العرض العادي
