مسرح عرائس للاطفال بمناسبة عيد النيروز

[Marina Greiss]

بندق وبندقة والبلح
" تخرج عروسة للاطفال قائلة "

العروسة الأم : إزايكم ياحبايبي عاملين إيه كل سنة وإنتوا طيبين ياتري عارفين انا بقولكم كل سنة وانتوا طيبين ليه
رد فعل الاطفال
العروسة الأم : شطار شطار طيب أنا إنهاردة كنت عاوزة أحكيلكم حكاية جميلة اوي عن ولاد صغنططين زيكم كدة
" نسمع دوشة من خلف الستار و "
بقولك سيبيها دي بتاعتي أنا
العروسة الأم : يادي الفضايح طب ثواني ياولاد أشوف ايه اللي بيحصل تحت
" نسمع من خلف الستارة "
العروسة الأم : انتوا بتتخانقوا ليه ايه طب لا انتي ولا هو يالله سيبي يالله
" تخرج العروسة مرة أخري "
الخادمة : خير ياطنط ف ايه
العروسة الأم : لا أبدا ده الولاد كانوا بيتخانقوا
الخادمة : ليه كدة طب اندهيلمهم ياطنط نسلم عليهم
العروسة الأم : ولو انهم ميستاهلوش بس حاضر .. يابندق يابندقة انتوا ياولاد تعالوا سلموا ع المس واخواتكم
بندق : اهلا وسهلا فين اخواتنا دول انتي خلفتي تاني ياماما
العروسة الأم : شوفي الواد لا مخلفتش بس دول اخواتك ف المعمودية
يعني ايه ياماما
يعني هما اتعمدوا وهما صغيرين وبقوا مسيحيين فبقوا اخواتكم
طب ماانتي متعمدة ياماما تبقي انتي اختنا بقي
العروسة الأم : اه اختكم وامكم ف نفس الوقت
ايه اللخبطة دي بقي يعني انتي دلوقتي هتاخدي مصروف زينا من بابا
لا يابندق لان بابا برده اخونا
العروسة الأم : بس انتي وهو انتوا لخبطوني وعشان كدة انتوا الاتنين محرومين م المصروف
الخادمة : ليه كدة بس ياطنط دول معملوش حاجة
العروسة الأم : لا عملوا من شوية يرضيكي يامس يتخانقوا مع بعض علي جوافاية
الخادمة : ايه ده انتوا عندكم جوافة ياطنط
العروسة الأم : اه جايباها عشان ياكلوها بمناسبة عيد النيروز وجايبة معاها نص كيلو بلح
الخادمة : نص كيلو بحاله
العروسة الأم : عيد بقي ولازم نصرف
الخادمة : طيب خلاص ياطنط انا عندي فكرة احنا نسألهم ليه بناكل بلح وجوافة ف عيد النيروز لو عرفوا يبقي نديهم المصروف ولو معرفوش
العروسة الأم : خلاص ولو معرفوش منديهمش مصروف ولا بلح وجوافة
الخادمة : لا حرام كفاية المصروف وبعدين عشان حتي كمية البلح دي ممكن تبوظ
العروسة الأم : معاكي حق
الخادمة : طيب يالله بندق يقولنا ليه بناكل بلح وبندقة تقولنا ليه بناكل جوافة
اشمعني بقي لا انا عاوز أنا اللي اقول ليه بناكل جوافة وبندقة تقول ليه بناكل بلح
لا ياخويا ماليش دعوي المس اختارتك انت الأول
العروسة الأم : اهو شايفة يامس هيتخانقوا مع بعض خلاص نعتبرهم مش عارفين الإجابة
الخادمة : استني بس ياطنط خلاص مش مشكلة قول ياعم بندق ليه جوافة
طب هتدفعوا كام
الخادمة : ايه يابندق ندفع كام إيه بس انت لو قلت صح هتاخد المصروف
يعني اللفة دي كلها عشان نص جنيه ماشي مش وحش برده بصوا اسمعوا كويس بقي .. لا الولاد مش مركزين يامس يالله قولوا ورايا بسم الأب " يرشم الصليب "
الخادمة : خلاص أهم مركزين أهو قول بقي يابندق
طيب بصوا ياولاد إحنا بناكل جوافة في عيد الفيروز
الخادمة : استني استني يابندق فيروز مين إسمه عيد النيروز
هه ؟؟ برافوا يامس انا بس بشوفكم مركزين ولا لأ .. المهم إحنا بناكل جوافة ف العيد اللي المس قالت عليه ده لإن البطيخ بيكون خلص وبتبقي دي الفاكهة اللي موجودة ف السوق .. يالله ايدك علي نص جنيه
العروسة الأم : ايدي علي نص جنيه قصدك ايدي علي قفاك " تضربه ويعيط "
معلش ياطنط معلش هو بس مش مركز معلش ايه بس يابندق اللي انت قلته ده
ايه اوعوا تقولوا انه غلط
الخادمة : ايوة غلط يابندق
اوبااااا راح النص جنيه
انا هقولك الإجابة يابندق
هعمل ايه انا بالإجابة أنا عاوز النص جنيه
العروسة الأم : شفتي الواد كل همه الفلوس
الخادمة : معلش ياطنط
يامس يامس أقول أنا
الخادمة : انتي عارفة يابندقة
اه يامس بس البلح مش الجوافة
الخادمة : طيب قولي يابندقة
اسمع بقي هه عشان هتتسأل بعدي
طيب ياختي
احنا بناكل البلح في عيد النيروز عشان لو اللي بيقولوا الكورال ف الحفلة غلطوا نضربهم بالنوا
العروسة الأم : طب ايه رأيك بقي النص كيلو كله هضربك بالنوا بتاعه تعالي " تضربها "
الخادمة : معلش ياطنط معلش هما عشان مبيجوش مدارس الأحد مش عارفين أي حاجة خلاص بقي قوليلنا انتي ياطنط وخلاص
العروسة الأم : هه أنا ؟؟ أصل أنا ورايا غسيل وسايبة الشامبو ف التلاجة
الخادمة : شامبو ف التلاجة
العروسة الأم : يوووه قصدي ف الفرن
الخادمة : خلاص خلاص ياطنط واضح انك انتي كمان مكنتيش بتروحي مدارس الأحد وإنتي صغيرة خلاص أقول أنا وخلاص " تقول المس المعلومة حسب سن الأطفال "

[بنت معلم الاجيال]

ميرسي ياحبي علي المشاركة الجميلة
ربنا يعوضك

[Mary Naeem]

شكرا على المشاركة
ربنا يفرح قلبك

[Marina Greiss]

ميرسى ليكم كتيييييير على مروركم