هانتعلم ازاى نحط ايدينا على الطريق اللى بيه نكتب بايدينا نصوص مسرح عرائس فواكه كنسى
** أولاً : ليه مهم انك تكتب نص بايديك ؟!
1. لأنك أكتر واحد عارف احتياجات أطفالك
2. لأنك أكتر واحد عارف الألفاظ المفهومة والغير مفهومة ليهم
3. لأنك أكتر واحد عارف الخصائص العمرية وتميزهم فى أشياء
4. لأن الموضوع مش صعب ولا بيحتاج وقت كتير
5. لأنك مش هاتستخسر تدى كام ساعة لربنا
6. لأنك مرتب وقتك وبتستعد للحفلة قبلها بوقت كافى
7. لأن ممكن يبقى عندك موهبة جميلة وتكتشفها لما تجرب تكتب
** ثانياً : ازاى أفكر من البداية ؟!
اسأل نفسك كام سؤال وحُط قدامك اجاباتهم مكتوبين على ورق :
1. انت هاتخاطب سنة كام ؟؟! (أرجوك ماتخليش الموضوع مفتوح مثال ابتدائى .. لكن قول مثال: من حضانة لثانية)
2. ايه المشكلة اللى بتعانى منها فى أولادك فى المرحلة ديه ؟؟! (ادى وقت للتفكير وماتستسهلش .. مثال: الزَن، الكدب، عدم المحبة، الطاعة، عدم قبول الاصدقاء، . . . . )
3. ما هى امكانياتك فى المسرحية:
- عدد الماسكات او الجوانتى او الماريونيت وشخصياتهم (أولاد/ بنات/ كبار فى السن/ حيوانات)
- عدد الخدام اللى هايشتركوا معاك بالتمثيل الصوتى والحركى
- الديكور المُتاح ومكان العرض
** بكده انت وصلت لمعلومات مهمة جداً .. تعالى نتخيل لو جاوبت على الاسئلة ديه هايطلع لك ايه ؟!
1. من حضانة لثانية ابتدائى
2. الطاعة
3. عندى 3 ماسكات (بنت/ ولد/ أم)
هناك 4 خدام موجودين للمساعدة
هأعرض فى الكنيسة .. لا يوجد غير ديكور جنينة
بالتالى: هاعمل حكاية بين بنت وولد وأمهم / والموقف لابد انه يحدث فى الحديقة / غير مسموح بالجرى والحركة الكتير علشان فى الكنيسة / هاراعى فى النص الالفاظ اللى تناسب السن اللى اخترته
*** ازاى افكر فى الموقف اللى هايبين حتمية الطاعة ؟؟!
هاسأل نفسى سؤالين :
1. ايه موقف حقيقى بيحصل بيمثل عدم الطاعة بين الاطفال وااليهم ؟؟ (مثال: المذاكرة / اللعب فى الشقة/ ... )
2. هل عايز النص بتاعك يكون واقعى ولا خيالى ؟؟
بالتالى:
لما تحدد الموقف اللى هايحصل
بسهولة تقدر تخلى شخصية مطيعة والتانية غير مطيعة .. مع توجيه الأم هايصبح الغير مطيع أكثر طاعة تدريجياً
وبسهولة اوى تقدر تصيغ ده فى حوار
أما لو عاوز الموضوع خيالى شوية :
ممكن استخدام حيوانات
أو مكان مختلف زى الفضاء
أو حتى موقف مختلف كعالم الاحلام
بجد الموضوع مش صعب
ويستحق المحاولة
