يوسف العظيم

[walaa farouk]

من وجهة نظركم .. إيه أعظم شخصية في الكتاب المقدس
الإجابات كانت كتير بس أكتر إجابة علقت معايا كانت لزميل قال لي بالحرف :

" يوسف طبعا .. لأنه كان غريب ووحيد وقدر يقاوم الخطية
والشاب مننا لما بيبقى غريب ولوحده بيقع بسهولة "

الحقيقة أنا كنت أكثر تحيزا للشاب الحليوة اللي جه من ورا الغنم في المربض
عشان يبقى ملك عظيم .. بكل ما له من تاريخ طويل في التعامل مع الله
ولكونه مر بكل ما يمكن لإنسان أنه يمر بيه .. خيانة وهروب وتجارب وحروب
وسقوط وتوبة وعقوق أبناء وموت أصدقاء ومسبة وشماتة أعداء ونكران جميل وهزايم ضخمة .
. كنت شايفة أنه نموذج بشري متكامل .. كل ما تبقى واقع في موقف معين
تقول أما أروح اشوف داود لما كان مكاني عمل ايه ..

لما نفكر في يوسف ..

نلاقيه ماكانش مغترب وبس .. يوسف كان وحيد .. في بلد مايعرفش فيها حد ..
وهو في سن صغير .. شاب عبراني ابن عز بيتباع كعبد في بلد ضخم مليان حضارة وثقافة تخوف ..

بس الحقيقة مش كدة وبس .. يوسف كان مجروح ..

وأصعب وقت يمر بيه الإنسان هو الوقت اللي بيكون فيه مجروح .. قلبه مش سليم ومش مرتاح.
الوقت اللي بيحس فيه أنه مخذول ومطعون من أحبائه من الناس اللي حبهم من كل قلبه ..

الوقت ده بيكون أكتر وقت أنت مستعد فيه لأنك ترمي نفسك في أقرب حضن
. في أقرب كف يطبطب .. في أقرب حفرة حتى .. لأقرب مشاعر تعوضك عن ألمك
.. المقترن بالوحدة والغربة ومرارة العبودية في حالة يوسف.

الإنسان المجروح .. ضعيف وهش ومهزوم وجعان .. جعان حب وثقة وأمل ورحمة ..

يوسف أكتر شخص كان هايبقى معذور لو سقط ..

يوسف كان مجروح وغريب ووحيد .. ماكانش ملك مُنَّعم سايب الحرب ونايم في قصره
شاف ست بتستحم اشتهاها وعمل معاها الشر ..

يوسف ماكانش في ناموس يقول له لا تزنِ .. ماكانش في أب ينتهره
ولا أصدقاء ينصحوه ولا اخوات يسندوه.

ومع ذلك كان ناموس لنفسه بضميره ورفض السقوط ..

يوسف كان شاب وحيد .. مغترب .. جدع

يبدو إننا محتاجين نهتم بأحبائنا المجروحين في الوقت اللي بيبقوا فيه أكثر عرضة للسقوط
.. والقرارات الخاطئة والحلول المدمرة.

يبدو إننا محتاجين نهتم بأحبائنا اللي الغربة كسرت حاجات كتير جواهم
وعزلتهم عن أسرهم وعن نفسهم القديمة وعن ثباتهم النفسي والروحي.

يبدو إننا محتاجين نفتقد النفوس الوحيدة اللي مستعدة تستسلم لأقرب حفرة.

يبدو إننا محتاجين ندي نظرة لصديق أو قريب أو شريك حياة الفراغ والوحدة
فاتحين له أبواب السقوط والضياع.

يبدو إننا محتاجين نركز قوي في قراراتنا .. وإحنا في غربة أو وحدة .. وإحنا مجروحين ..

يبدو إننا محتاجين نبذل كتير م الجهد عشان يكون عندنا شجاعة الرفض
لكل المشاعر المزيفة اللي بتتعرض علينا في وقت ضعفنا وألمنا.

يبدو إننا محتاجين مراجعة جادة وشجاعة للحلول والمواقف اللي بنتجه لها وقت الأزمة ..

يوسف فعلا عظيم .. فلنكن مثل يوسف.

[Mary Naeem]

يبدو إننا محتاجين مراجعة جادة وشجاعة للحلول والمواقف اللي بنتجه لها وقت الأزمة

صح الكلام
ربنا يباركك

[walaa farouk]

ميرسى على مرورك الغالى