الحب عكس الأنا

walaa farouk · رقم المشاركة : ( 1 ) 13 - 11 - 2018, 04:29 PM

في الحُب بقي الموضوع بيمشي عكس المشاعر تماماً..
للي فاكرين الحُب عبارة عن اغاني رومانسية
ودباديب وهدايا وسهوكة في الكلام وكدة.
. تعالولي هنااااا... مفيش الكلام دا.. سامعين!!!
(هو للأمانة يعني.. الحاجات دي موجودة برضو ماننكرش )
بس مش دا الاساس.. دي ممكن نقول كدة التحابيش اللي علي الوش.
. حبة الكريز والكريمة اللي بنحطها تزويقة التورتة في الاخر..
بس مش هي التورتة.. صدقني ماهي التورتة!!!
طب ايه التورتة؟؟

تعالالي بقي.. الشغل كله في الحتة اللي باتكلم فيها دي
(كسر الانانية).. كسر التوهان وعدم الالتزام في العلاقات.
. مش منين ماتحب تقول "بحبك ويلا اشطة"
.. ومنين ما تزهق او تقابل مشكلة "هوباا يلا نفركش
".. (انا عارف ان معظمنا كدة) بس للأسف دا مش حُب
.. دي بتعبير ادق زي ما بيقولوا في بلاد برا كدة
i have feelings to you.. مجرد مشاعر..
يمكن تكون المشاعر دي بداية الحُب
.. ويمكن تكون مشاعر مبعترة وغير ناضجة نهايتها سد..
بس مش هي الحُب.. الحب اكبر واصعب من كدة بمراحل!

الحب صعب.. تخيل انك بارادتك بتدي نفسك للشخص اللي قدامك..
بكل فكرك ومشاعرك وامكانياتك ووقتك ومجهودك.. علي طوووول!

مفيش فيه اجازة!!
مفيش فيه "زهقت"!!
مفيش فيه "فركش"!!
مفيش فيه "خلاص رصيد فرصك خلص"!!
مفيش فيه "استبن" لو دا مش موجود التاني يسد!
...
فيه "انا متاح ليك ٢٤ ساعة"!!
فيه "مسامحك وفي اكيد فرصة تانية"!
فيه "انا اسف"!
فيه "مهما حصل هانكمل"!

لاحسن تكونوا فاكرين الحب سهل.. حمادة!!!!
الحُب تكريس كامل، وعهد مايتكسرش للشخص اللي معاك.
. التزام يدوّب الخلافات، ويكسر كلمة "أنا
" اللي مبوظة وخاربة معظم البيوت دي.. مفيش "أنا"
..مفيش "بمزاجي".. انا اجي بعدين.. انا اجي في الاخر..

وكل ما الـ"أنا" اللي جواك دي تنزل، وتبتدي تبص علي اللي معاك
باحتياجاته بمشاعره بظروفه
.. وتنسي "أنا" شوية.. كل ما هاتستمتع بالحب وتدوق حلاوة العلاقة.
. وتفهم بقي.. هو ليه كل البيوت دي خربانة؟
هي ليه كلمة "يلا نفركش" بقت اسهل حاجة الايام دي؟
هو ليه بداية العلاقة جميلة.. وباقيها سواد؟

الاجابة ببساطة: عشان لسا في كلمة "أنا"!

#الحب_عكس_الأنا

Mary Naeem · 14 - 11 - 2018, 09:56 AM

هي ليه كلمة "يلا نفركش" بقت اسهل حاجة الايام دي؟
هو ليه بداية العلاقة جميلة.. وباقيها سواد؟

الاجابة ببساطة: عشان لسا في كلمة "أنا"!

#الحب_عكس_الأنا

صح يا قمر
ربنا يباركك حببتي

walaa farouk · 14 - 11 - 2018, 08:38 PM

ميرسى على مرورك الغالى الحب عكس الأنا

مورا مرمر · 20 - 11 - 2018, 06:56 PM

موضوع حلوووو اوووى
ميرسى ليكى ..

walaa farouk · 20 - 11 - 2018, 07:48 PM

ميرسى على مرورك الغالى الحب عكس الأنا