يرحم ايامك يا مبارك !!!

[محتاجه لايدك ياربى]

ماهو قالها حكمه فى كلامه
لو هاأمشى تلاقوهُم قاموا
من كُتر إللى شُفناه مِنهُم
ناقص نهتف فين أيَّامُه

وصحيح عصرك كان كمونى
وقنابل فينا بتفَرقَع
وعساكر بلا تُهمه خدونى
وإيدين فى أفايا بتطرقع

وفساد كان واصل للرُّكبه
عَبَارة وقَطر ودم رخيص
فقر وحاجات سوده وصعبه
وده كله وخطَه للتوريث

بس الإخوان والسَّلَفِيين
من بعد مانارهُم لَسَعِتنا
قولنا الأهون منهم نارَك
يرحم ايامك يا مبارك


ده جرى لنا أكتر ماجرى لك
وكأن المصريين ظلموك
وجَت الجماعات أخدت تارَك

العوا أنكَر إسلامها
وبرضو بيطالبوا بكاميليا
هَدِّدوا مَصر وسَرَقوا سلامها
شوفوا قنا وآبو قُرقاص فى المنيا

قالوا علينا كفره وخاينين
هَدُّوا كنيستنا إللى فـ أطفيح
قطعوا ودان القبطى المِسكين
دى مُجَرد أمثلة للتَوضيح

يعنى الإخوان والسَلَفيين
من بعد مانارهُم لَسَعِتنا
قولنا الأهون منهم نارَك
يرحم أيامك يامبارك

حرق وتقتيل جُوَه إمبابه
والحِجَّه عبير المخطوفة
دى حِجَجهُم فارغَه وكَدَابَه
وخطِطهم صَبِحت مَكشوفه

يعملوا عَملِتهم وشويَه
واحد منهم يجى يهَدِى
نِهتِف للوِحدَه الوطنيَه
وِنفَوِت ليهم ونعَدِى

ويادوبك هم يومين إتنين
ونلاقى نارهم لَسَعِتنا
فَنقُول أهون مِنهُم نارَك
يرحَم أيامَك يامبارك

كلمات الشاعر المبدع
رمـــزى بشــــــــــاره