سلمنا فصرنا نحمل

[walaa farouk]

‏

انا لما سَلمت وسِبت نَفسي شوية، لقيت حياتي بتتبدل، لقيت الاحداث متخططة بدقة والمواعيد مظبوطة، انا لما سِبت نفسي "إتشالت" وربنا قام بكل حاجة، انا متعبتش في حاجة ومَعنِدتش ولا شبطت اني املُك حاجة بالعافية.. انا قولت هصلي واسيب نفسي لقيت المشاهد بتتحرك لوحدها وانا متشالة.. وانا مطمنة..

‏تفاصيل حياتي وتركيبتها، شيء مُعقد بنسبالي.. انا لوقت حسيت اني صعب أكمل حياتي بعقلي لوحدي.. انا كُنت بتعب م التفكير والتخطيط، كُنت بجهل الحاجات اللي تِنفَعني؛ دايما بشوفها من برة صالحة ليا واتصدم بعكس كدة في الاخر.. كنت ماشية بكل قوايا العقلية وبرضو بنتهي بالفشل، وبرضو بقع وأتهد عالأرض

‏وأعمل ناصحة واقوم واجدد كل خِطَتي وتفسيراتي لكل حاجة في حياتي، افتكر اني بقيت واعية بس دايما كنت انجح في ربع السكة وارجع تاني اعاني من كآبتي وفشلي.. انا ملقتش حلول تانية تنفع إني اعيش من غير قلق وتفكير واختيارات غلط في غلط، انا مَلّيت من القوانين اللي بجربها واتوقع نتيجة مختلفة كل مرة

‏كانت اخر وقعة ليا بتمَرُد.. هتمَرد علي القلم اللي واخداه في نفسي اني اقدر اعمل كل وأي حاجة لوحدي.. انا متخلقتش عالأرض عشان اغوص فيها لوحدي.. وعلي نفس وضعي عالأرض مَقومتش غير بصلاه! مكانش علي لساني ولا كلمة، وريتله كل جروحي المِعلمة، ذكرياتي، وقعاتي، قِلة حيلتي وضعفاتي وطباعي البَشِعة..

‏وبصرخة مكتومة ومن غير ولا صوت.. سِبت نفسي؛ سِبتها تتشال علي ايده.. يارب انا مبعرفش أفكر، انا كل اساليبي فاشلة واختياراتي غلط.. شِلني وحرَّك حياتي زي ما تشوفها.. ساعدني حتي وانا بختار وإبعدني بسرعة عن الشر وأنا وعد مني ما هشبَط ولا هعنِد ولا اتذمر.. "لتكن مشيئتك" ومن يومها كل حاجة اتبدلت..


#الآن_رآتك_عيني (ايوب ٥:٤٢)
#سلمنا_فصرنا_نُحمل (اعمال الرسل ١٥:٢٧)