افعال تؤدي للتعاسة

[walaa farouk]

1- كُتر الشكوى
الشكوى بشكل مستمر بتأثر بشكل سلبي على حالتنا المزاجية والنفسية وده لأنها دايمًا بتخليك مش راضي عن أبسط تفاصيل حياتك اليومية، تأثير كُتر الشكوى على الدماغ تأثير سلبي بشكل قوي جدًا بيساعد الإنسان على وصول أعلى مراحل الإكتئاب والقلق والتوتر وبيخليه دايمًا باصص لنص الكوباية الفاضي
2- الهروب من المشاكل
الهروب من المشاكل وتجنبها بدل من مواجهتها وحلها هيكبر من صعوبة المشكلة وهيحولك لشخص تعيس سلبي ماعندوش القدرة إنه يتغلب على مشاكله فى أي يوم من الأيام
3- إنك تقارن نفسك دايمًا بغيرك
المقارنة المستمرة بتسبب إحساس بعد فترة بقلة الثقة بالنفس وقلة إحترامك لنفسك ولنقاط قوتك وقدراتك، وبتخليك تركز دايمًا على اللي مش معاك ومن هنا بتبدأ لذة الإستمتاع بالحياة تقل وتبدأ تتحول لشخص ضعيف سلبي
4- قلقك المستمر من الحاجات اللي لسة محصلتش لحد دلوقتي
قلقك المستمر من اللي لسة محصلش لحد دلوقتي هيخلي حياتك مش مستقرة وصعبة وهيدخلك بعد فترة قصيرة فحالة من حالات الإكتئاب الشديد اللي هيصعب عليك تخرج نفسك منه وده طبعًا هيأثر بشكل سلبي على تصرفاتك فى حياتك الإجتماعية وإنتاجيتك في حياتك المهنية
5- إنك تعمل حاجة مابتحبهاش
إنك تعمل حاجة مابتحبهاش زي دراسة أو شغل، هيخلي حياتك مملة ومافيهاش شغف وهيخليك لما ترجع بشريط حياتك هتلاقي إنه شريط فاتر وكئيب ومافيهوش لحظة واحدة أنت ممتن إنك عيشتها
6- العلاقات الُمنتهية اللي لسة بتحاول فيها
كلمة علاقة هنا المقصود بيها كل أنواع العلاقات مش بس العلاقات العاطفية، المقاوحة في إنك تكمل فى علاقة فاشلة هيستنفذ كل جهدك وطاقتك ووقتك ومش هيعود عليك غير بالتعاسة والحزن
7- إنك تحاول تغير الناس بدل ماتغير نفسك
إنك تنشغل بعيوب الناس كحجة عشان تشغل نفسك عن عيوبها، ده لا هيصلح منك كشخص ولا هيديك الفرصة إنك تستمتع بالحياة وبالحاجات البسيطة اللي بيقدمهالك اللي حواليك عشان يسعدوك
8- إنك تحاول ترضي كل اللي حواليك
مافيش أفشل وأتعس من الشخص اللي بيحاول يرضي كل الناس فى الحياة، وده بيرجع لأختلاف طباعهم وأرائهم ومعتقداتهم فمن المستحيل إنك تلاقي شخص أو شئ إتفقت عليه الدنيا كلها
9- إنك تربط سعادتك بشخص\شئ\هدف
ربط السعادة بأي مصدر خارجي زي شخص بتحاول دايمًا ترضيه أو هدف نفسك تحققه، هيخليك إنسان تعيس لحين تحقيقك لهدفك وتحقيق الأهداف ده مابيجيش فى يوم وليلة ده أحيانًا بياخد شهور أو سنين وممكن بعد شهور أو سنين مايتحققش أو العلاقة دي متكملش

[Mary Naeem]

إنك تعمل حاجة مابتحبهاش زي دراسة أو شغل،
صح يا قمر

[walaa farouk]

ميرسى على مرورك الغالى