وسط الزحمة
وسط الشارع والناس والعربيات والدخان مع الميكروباص والمسّتنى... السائق والتعبان وسط الزحمة كلام كتير ومشاوير وحكايات ندّور مع كل واحد ايه حكايته ونفهم من بين السكات سواق اتوبيس ماشى بالعافية شغلانة تعبانة وجايباله الكافية سواق تاكسى متعود وزهقان ماشى سرحان ف ابنه التعبان سواق ملاكى بيقول يا باسط سلكها وفكها من عندك ماشى على مهله ومتأخر سرحان ف علاوة ومصيف ووشه متكدر سواق نقل و دى شغلته من هنا لهنا وتعبت صحته وواحد ماشى على رجليه شايل هم الدنيا والناس واللى حواليه بيبص فى السما وسط حزن وملل بيحاول وسط الدخان يلقى أى أمل طفل ماشى ف عزّ النهار يبيع فل داير من الصبح يدوّر على رزق بس مرفوض ومطّنش من الكل نفسه يفهم طفل جميل ماشى ف عربية يعنى ايه يعنى إيه وليه هو يمشى على رجليه؟ ليه أمه تدور تلف تبيع عسل وناس تانية عايشة زهقانة من الكسل ليه هو يستحمل حر الصيف وغيره باصصله بقرف من عربية بالتكييف؟ وتمشى تلف وسط الناس...تشوف حاجات كتير عربية تايهة ماشية مش عارفة لفين صاحبها محبط سايق ناسى طريقه منين أو ماشى مكسور يدور على حبيبته فى الشارع والعربيات اللى ماشيين جنبه كلنا زهقنا وملّينا طريقنا الماشيين فيه مش عارفيين هيخلص امتى ولمّا نوصل هنلاقى ايه! يمكن منلاقيش مكان ويمكن نلقى الميعاد فات يمكن ننسى رحنا ليه ويمكن نتوه وسط الحارات بس أكيد بيقتلنا ملل السكات وزهقنا من الكاسيتات والراديوهات! يمكن تغّير طريقك خالص توصل أسرع لمكانك يمكن تلاقى طلبك ناقص وتندم عالوقت واللى فاتك كلنا زى بعض ف الآخر نفس التعب والزهق نفس الانتظار والتفكير والقلق ربنا يتوب علينا من الحر والدخان والفيروس والزحمة والغرامة والسايس كمان! يارب نمشى مبسوطين و ف الآخر نلاقى ركنة نبقى هاديين مطمنين و نوصل دايماً ف ميعادنا وندعيلك يا بلدى من القلب ومن جوّا يعمرك وينجحك ويدينا إحنا بقى الصبر و القوة
