حور (اللي سند إيدين الصلاة)

[walaa farouk]

حور
(اللي سند إيدين الصلاة)
دايماً لما بنيجي نحكي عن الحرب مع عماليق،
بنقعد نتكلم عن العواصف والسيوف ويشوع اللي كان بيحارب تحت في الوادي،
وبننسى خالص "النعمة" اللي كانت واقفة فوق الجبل بتسند..
وبننسى حور
الراجل اللي وقف في الظل عشان النصر يكمل.
حور ده مكنش مجرد واحد من الشعب،
ده كان بطل في الظل بجد.

تخيل الحرب شغالة، وموسى النبي واقف فوق الجبل رافع إيديه بيصلي،
وطول ما إيديه مرفوعة يشوع غالب،
لكن أول ما إيديه تتعب وتنزل يشوع يتكسر..

الوجع إن موسى إنسان وليه طاقة،
وتعب فعلاً.
وهنا ظهر معدن حور الأصيل اللي مسبش الراجل يقع،
وعشان كدة الكتاب بيقول: 👇🏻
"وَأَمَّا يَدَا مُوسَى فَصَارَتَا ثَقِيلَتَيْنِ..
فَأَخَذَا حَجَراً وَوَضَعَاهُ تَحْتَهُ فَجَلَسَ عَلَيْهِ. وَدَعَمَ هَارُونُ وَحُورُ يَدَيْهِ"
(خروج 17: 12)

لو حور مكنش راجل قلبه حي،
مكنش حس بتعب موسى ولا شال معاه الهم ده الساعات دي كلها.
البطولة الحقيقية لحور ظهرت في إنه رضي بدور "المسند".
مطلعش يجري ورا صيت ولا قال أنا اللي كسبت الحرب،
ده فضل واقف في مكانه، صامد وهادي، واحد من الناحية دي والتاني من الناحية التانية،
عشان خاطر الصلاة متقفش، لدرجة إن الآية بتقول: 👇🏻
"فَكَانَتْ يَدَاهُ ثَابِتَتَيْنِ إِلَى غُرُوبِ الشَّمْسِ"
(خروج 17: 12)

حور مكنش بطل بالكلام، ده كان بطل "بالفعل والصبر".
هو اللي كان عارف إن لو إيدين موسى نزلت الكل هيضيع،
فقرر يكون هو القوة الخفية اللي ورا الثبات ده.
وفي الآخر،
لما الحرب خلصت والكل فرح بالنصر،
ربنا سجل اسم حور في كتابه عشان يعلمنا إن اللي بيسند إيدين اللي بيصلوا
، له نصيب في النصر زيهم بالظبط.
حور اللي مسمعناش صوته في السفر،
ربنا خلاه يكون سبب في إن الشمس متغربش إلا والشعب منتصر.

طيب نتعلم إيه من حور؟
نتعلم إننا ما نبصش على العاصفة ونقول إحنا مالنا،
لكن نكون إحنا "النعمة" والكتف اللي بيشيل مع التعبانين.
حور بطل في الظل لأنه مورناش بطولته في الميدان،
لكن ورانا إخلاصه في السند اللي جاب النصر للكل.