مرة واحد صعيدى
بيقول لك مرة واحد صعيدى
لأ ..
مرة واحد وعشرين صعيدى
سافروا يشتغلوا فى ليبيا عشان القوت
قوم إتدبحوا من غير ما يطلع لهم صوت
براس مرفوعة لدرجة يخاف منها الموت
+ + +
مرة واحد وعشرين صعيدى
شافوا حياتهم قدام أبديتهم قد كده رخيصة
كتبوا بدمهم سطر جديد فى تاريخ الكنيسة
كانوا أسود واللى دبحهم خايف كأنه الفريسة
+ + +
مرة واحد وعشرين صعيدى
خلّوا البحر الأبيض يبقى الأحمر بدماهم
وشافوا يسوع فوق ف السما بيستناهم
صرخوا بإسمه وندهوا عليه وهو ناداهم
+ + +
مرة واحد وعشرين صعيدى
حيروا العالم وقالوا باين عليهم متخدرين
وناس تقول ده فيلم ودول ممثلين متأجرين
وماحدش عارف سر الإكليل اللى به متبشرين
+ + +
مرة واحد وعشرين صعيدى
واحد قال لهم حأدبحكم قالوا له وماله يا خويا
هو أنا يعنى حأخاف على نفسى أكتر من أبويا
بس إنت إوعى تخاف .. وإن خفت .. غمّى عينك بمنديل بأويا
. حازم كامل
