*🌙❤️ يا رب، وجودك في حياتي أجمل نعمة 🫂

[Dr-marina]

*🌙❤️ يا رب، وجودك في حياتي أجمل نعمة 🫂*

يا ربي يسوع حبيبي…

قبل ما أنام، عايز أقولك حاجة من غير ترتيب، ومن غير كلام محفوظ…
أنا بحبك. ❤️
بحبك يا رب لأنك بقيت الجزء الحلو في حياتي…
لما بفرح، بلاقي نفسي عايز أقولك.
ولما أتعب، أول حد بجري عليه هو إنت.
ولما الدنيا تتلخبط، مجرد ما أفتكر إنك موجود، قلبي بيهدى.

يمكن أنا مش دايمًا بعرف أعبّر عن حبي ليك، ويمكن كتير بنشغل عنك وأنا مشغول بالدنيا…
لكن إنت عمرك ما انشغلت عني.

شكرًا يا ربى يسوع…
على حبك اللي مش بيتغير بتغيّر أيامي.
على إنك بتقبلني وأنا قوي، وأنا ضعيف.
على إنك بتفرح برجوعي ليك حتى لو كنت بعيد.

يا ربى حبيبي…
أنا مش عايز أنام الليلة وأنا بفكر في اللي ناقصني.
عايز أنام وأنا فاكر قد إيه عندي نعمة كبيرة اسمها إنت. 🤍

ولو في حاجة وجعت قلبي النهارده، أنا مش هفضل أحكيها…
إنت عارفها.
ولو في حاجة نفسي فيها، إنت عارفها.
ولو في شخص شاغلني، إنت عارفه.
أنا بس هقولك:
نسيني كل حد وكل حاجه… وخلي قلبي عندك إنت.

يا ربى يسوع حبيبي، نفسي أصحى بكرة وأنا بحبك أكتر من النهارده.
نفسي محبتك تبان في طريقتي، في كلامي، في معاملتي، وفي كل حاجة بعملها.

علّمني أحب من غير ما أستنى مقابل.
أسامح من غير ما أعاتب.
وأدي من غير ما أحسب أنا أديت إيه.
لأنك إنت علمتني إن أجمل حب هو الحب اللي يبذل نفسه. ❤️

يا ربى يسوع حبيبي…
لو أنا نسيت النهارده أشكرك، سامحني.
ولو قصّرت في حقك، قربني منك.
ولو قلبي اتشغل عنك، رجّعه لك بحنانك.

ودلوقتي…
أنا هقفل عيني،
ومش هاخد معايا غير حاجة واحدة:
إني محبوب منك. 🫂❤️
ودي كفاية جدًا عشان أنام مطمّن.

خليك قريب مني وأنا نايم يا ربى حبيبي،
واحفظ قلبي من كل خوف،
وخلي نومي في سلامك.
ولما اصحى بكرة،
خليني أبدأ اليوم بنفس الكلمة اللي هنام بيها الليلة:
بحبك يا ربى يسوع…
وشكرًا لأنك بتحبني أكتر مما أقدر أتخيل. 🌙❤️

تصبح على خير يا ربى حبيبي يسوع…
وخلي قلبي ينام في حضنك. 🫂🤍

[Mary Naeem]

مشاركة في قمة الجمال

ربنا يبارك حياتك