*🌙❤️ لو سالتني عنأجمل حاجة في يومي… هقولك إنت يارب 🫂*

[Dr-marina]

*🌙❤️ لو سالتني عنأجمل حاجة في يومي… هقولك إنت يارب 🫂*

يا ربي يسوع حبيبي…

لو سألتني النهارده: «إيه أجمل حاجة حصلتلك؟»
مش هقولك موقف حلو، ولا خبر فرّحني، ولا حاجة كنت مستنيها وحصلت…

هقولك: إنك كنت معايا. ❤️

يمكن أنا عديت اليوم بسرعة، واتشغلت، وضحكت، واتضايقت، واتكلمت مع ناس، وعملت حاجات كتير…
لكن دلوقتي وأنا واقف قدامك، اكتشفت إن أجمل حاجة في اليوم كله إنك كنت ماشي معايا وأنا مش واخد بالي.

شكرًا يا ربى حبيبي…
على كل لحظة عدّيتها بسلام، وعلى كل مرة كنت هزعل فيها ومنعتني، وعلى كل حاجة كنت فاكرها صدفة وطلعت إيدك الحلوة.

وشكرًا حتى على الحاجات اللي ما فهمتهاش.
يمكن أنا النهارده سألت: «ليه؟»
لكن دلوقتي بقولك: أنا واثق فيك حتى لو لسه مش فاهم. 🤍

يا ربى يسوع، في حاجات جوايا لسه محتاجة لمستك…
حاجة نفسي تتصلح، وحاجة نفسي تتغير، وحاجة نفسي أنساها، وحاجة نفسي تحصل.

بس مش هقعد الليلة أقولك إزاي تعملها…
أنا هقولك بس:

اعمل إنت.

إنت عارف قلبي أكتر مني.
إنت عارف إيه اللي ينفعني وإيه اللي يضرني.
إنت عارف إمتى تديني، وإمتى تمنع، وإمتى تخليني أستنى.

فأنا هسيب لك القيادة… وأريح قلبي. 🫂

يا ربى يسوع، سامحني على كل مرة النهارده اتصرفّت فيها من غير ما أفتكر إنك موجود.
سامحني على كلمة وجعت حد، أو فكرة غلط، أو لحظة شك، أو حاجة خلتني أبعد عنك.

ونضّف قلبي قبل ما أنام…
مش عايز أصحى بكرة بنفس القلب اللي نام النهارده.

عايز أصحى أخف…
أهدى…
وأقرب ليك. ❤️

ودلوقتي يا ربى حبيبي، أنا مش عايز حاجة غير إنك تطمّن قلبي.

خلّي كل حاجة أنا مش قادر أحلها تنام عند رجليك الليلة.

خلّي بكرة في إيدك.
والناس في إيدك.
واللي بحبه في إيدك.
واللي بخاف منه في إيدك.
وأنا كمان… في إيدك.

هقفل عيني وأنا مش عارف بكرة هيحصل فيه إيه…

لكن عندي يقين واحد يكفيني:

اللي بيحبني هو اللي ماسك بكرة. ❤️

تصبح على خير يا ربى حبيبي…
أنا هنام، وإنت خلي بالك من قلبي.

ولو صحيت بالليل وقلبي فكر في حاجة تقلقه، فكّره بيك.

ولو صحيت الصبح، خلّي أول إحساس جوايا يكون:

«ياااه… أنا لسه محبوب منك يارب.» 🫂❤️

بحبك يا رب…
وشكرًا إنك كنت أجمل حاجة في يومي،
وأجمل حاجة هنام وأنا حاسس بيها الليلة. 🌙🤍

[Mary Naeem]

مشاركة جميلة جدا
ربنا يبارك حياتك