الكبت النفسي (Repression)

[walaa farouk]

كام واحد فينا قرر إنه مايتكلمش عشان يرضي الناس، كام واحد اتظلم وقرر إنه مش هيواجه وفضل إنه يسكت، كام واحد مقالش افكاره ولا عبر عن مشاعره خوفا من الرفض.
كتير مننا معتقد إنه لما يسكت علي حاجة محتاج يعبر عنها أو يكبت مشاعره هو كده بيحمي نفسه، او بيحافظ علي صورته المجتمعية قدام الناس، او بيريح دماغه .
ايه هو الكبت النفسي ؟
الكبت النفسي (Repression)
هو طريقة نفسية دفاعية بيمارسها الإنسان عشان يهرب من مواجهت مشاعره وافكاره السلبية ، تجاهل الإنسان لصدماته، وذكرياته الصعبة، وتجاربه المولمة، مع طبيعة ضغوط الحياه اليوميه و الكبت المستمر للمشاعر دي بتزيد وبتوصلك للضغط والاضطراب النفسي
تتفاجئ إنك في موقف بسيط يحصل بتنفعل بـزياده، او فجاه تحس بحزن شديد ومفيش حاجة حصلت
بتقول كلام من نوعية " انا مش هروح اتكلم عشان مش عايز اخسر حد، انا تعبان جدا بس معنديش وقت للانهيار، سخرية وتقليل من ضغوط الآخرين عشان توصل إن ضغطك كبير مقارنة باي حد " ده بيبقي نتيجة استقرار المشاعر السلبية في العقل الباطن وعدم تفريغها لحد ما بقت بتآذيك وبتآذي المحيطين بيك.

اسباب الكبت ؟
1- التربية القاسية علي معتقدات خاطئة زي إنت راجل متعيطش، او انت لو قولت انت زعلت من الموقف ده هيقولوا عليك قموصه، بيتربي الطفل علي انه ميعبرش عن مشاعره لانه لو عبر عنها هيبقي ضعيف وبالتالي بيبقي حاسس إنه لازم يتصرف بمثاليه ويكبت اي مشاعر غير مرغوب فيها وبالتالي بيفضل طول عمره مشحون فيكبر يبقي شخص عصبي، كتوم، عنيف، عدواني ،مضطرب.
2- الهوس بفكره الصورة اللي الناس واخدنها عني فيبقي طول الوقت مجامل بزيادة مبيقولش الحقيقة خوفا علي صورته في عيون الآخرين يعني لو الناس بتقول عليه إنه جميل هدوئه وهو شخصيه حماسية فيفضل يمثل الهدوء عشان يوصل للتقدير اللي محتاجه فبيدأ يكبت في مشاعره وشخصيته الحقيقة
3- التجارب السلبية المتكررة
مع كثرة الصدمات والتجارب السلبية، بيقرر الإنسان إنه يحصن مشاعره فيكبتها خوف من انها تتآذي تاني ويتصدم تاني.