بتواضعك ده يا ابني أنت اللي غلبتني وغلبت الشيطان

[walaa farouk]

حكاية من بستان الرهبان
​
​كان فيه راهب اسمه تادرس، وتلميذ لأب كبير قوي اسمه الأنبا باخوميوس اب الشركة.

وفي يوم، وبسبب سوء تفاهم بسيط، الأب انتهر أبونا تادرس
وزعق له قدام الكل، مع إن أبونا تادرس ماكانش عمل أي حاجة غلط! 😔

​في الوقت دا أبونا تادرس كان قدامه طريقين:
يا إما يزعل ويقول "أنا مظلوم"
ويبعد عن أبوه وعن صلاته،
يا إما يكسر كبرياءه ويشتري سلامه النفسي.

أبونا ​تادرس مافكرش كتير، جرى وسجد قدام أبوه الروحي وقاله:
"سامحني يا أبا، أنا أخطأت". 👣

تخيل! هو مش غلطان، بس قال "أنا غلطان"
عشان المركب تمشي وعشان قلبه يفضل نضيف من ناحية ربنا.

​لما الأنبا باخوميوس هدي وعرف الحقيقة،
بكي من كتر ما اتعلم درس كبير من تلميذه،
وقاله: "بتواضعك ده يا ابني، أنت اللي غلبتني وغلبت الشيطان" 🤍

​ايه اللي نتعلمه من الحكاية البسيطة دي
​ماتقطعش السلك:
الصلاة هي السلك اللي واصل بينك وبين ربنا، أوعى "الزعل" يخليك تقطع السلك ده،
لأنك محتاج لربنا يطبطب عليك وأنت مظلوم.

​المطانية بتفك العقد:
لما بنقول "سامحني"
وإحنا صح، إحنا مش بننزل من قيمتنا،
إحنا بنرتفع في عين ربنا وبنحافظ على سلامنا.

​"مَنْ هُوَ حَكِيمٌ وَعَالِمٌ بَيْنَكُمْ، فَلْيُرِ خَلائِقَهُ بِالتَّصَرُّفِ الْحَسَنِ فِي وَدَاعَةِ الْحِكْمَةِ."
(يعقوب 3: 13)