أرجــوكم أخدموا في هدوء ✋🏻

[walaa farouk]

رسالة إلى خدام ومُعلمي الكنيسة !
من نيافة الأنبا رافائيل :
أرجــوكم أخدموا في هدوء ✋🏻
وكل واحد فينا يخدم يكون سبب بناء مش سبب برجلة !
اللي بيبرجل الناس ده الكنيسة تتعب منه !
الُمعلم في الكنيسة خطيته وأخطائه بتأثر في الناس اللي هو بيعلمهم !
علشان كده الكنيسة أخدت موقف من أوريجانوس وماخدتش موقف من سمعان الخراز !
سؤال :
لما أوريجانوس نفذ الآية حرفيًا الكنيسة حرمته ، في حين إن لما سمعان الخراز نفذ آيه تانية حرفيًا أصبح قديس عظيم ونقل جبل المقطم ، يعني ممكن أوريجانوس نفذ الآيه برضو ببساطة ، بس ليه الكنيسة أخدت الموقف ده مش زي اللي حصل مع سمعان الخراز ؟
الإجابة :
أقولك ليه ... نمرة واحد أوريجانوس ماكنش إنسان بسيط ده كان عالم من علماء الكنيسة ... بينما سمعان الخراز رجل اسكافي بتاع جزم إنسان بسيط .
نمرة اتنين أوريجانوس كان قاعد يخطط يعني هو قعد مش عفويًا راح قطع خصيتيه، هو قاعد يفكر أنا علشان أتجنب الخطية دي أو علشان العثرة أو علشان مش عارف ايه راح عمل بخطة ... بينما سمعان الخراز عمل عفويًا بمجرد واحدة جاية تغرية راح على طول مسك المخراز وقلع عينه فده عفويًا .
نمرة تلاتة أوريجانوس كان معلم في الكنيسة وبالتالي ممكن الناس تتعلم منه وتقتاد بيه وتعمل كده زيه ... بينما سمعان الخراز كان رجل بسيط مش معلم محدش هيمشي وراه !
ودي بتبين خطورة المعلم في الكنيسة عن الإنسان العادي ، الإنسان العادي خطيته وأخطائه تلصق بيه ، المعلم خطيته وأخطائه بتأثر في الناس اللي هو بيعلمهم ، علشان كده الكنيسة أخدت موقف من أوريجانوس وماخدتش موقف من سمعان الخراز .
حاجة بقى نمرة أربعة ... الموقف الذي أُخذ من أوريجانوس مش اتاخد بعد ما أخصى نفسه لكن بعد ماقبل الكهنوت ، لأن المفروض اللي يتقدم للكهنوت ويتوافق على كهنوته مايكونش في عيوب في جسده ، إذا حصل عيوب في الجسد بعد الكهنوت دي حاجة بتاعة ربنا ، يعني واحد بعيد عنكم جاله شلل ، فقد بصره ، فقد سمعه ... لكن مايكونش أصلا عنده عيب ونيجي نرسمه قسيس .
إزاي يا أوريجانوس وأنت عارف إنك عامل في نفسك كده تروح تقبل الكهنوت من بطرك غير بطركك ، راح أخده في فلسطين ، بالإضافة إلى أخطائه العقائدية الكثيرة اللي خلت الكنيسة يعني حساسة معاه .
يعني أحيانًا واحد بيبقى عنده ميزات كتيرة - بصراحة يعني - وبيخدم الكنيسة ومش مسبب إنزعاج ومش مسبب توتر ولا حواليه مشاكل يعني يوم مايغلط حاجة بتعدي بتتبلع ... لكن لما يكون هو أساسًا مرارة في الكنيسة ، سبب انقسام ، سبب الناس بتتخانق عليه فيصير برضو مسبب أزمة !
وأنا بقولكم برضو بالمناسبة دي أرجوكم اخدموا في هدوء ، كل واحد فينا يخدم يكون سبب بناء مش سبب برجلة ، اللي بيبرجل الناس ده الكنيسة تتعب منه !
لنيافة الأنبا رافائيل ♥️