ما كنتش أعرف.

[walaa farouk]

ما كنتش أعرف.
او يمكن كنت عارف بس مش مصدق و باكدب نفسي ..
ما كنتش أعرف أن فيه ناس قلبها اسود لدرجة انهم بيؤذوا بوعي و بدون وعي ،
و هم بس بيعدوا قدامك، بنظرة وحشة أو بكلمة أوحش، أو و هم بيفكروا في أذية غيرهم ..
و ما كنتش أعرف أن الأذية طبعهم، و من كتر ما هم كده صدقوا انهم كده هم صح..
و لما تحط علي ده حبة تدين علي حبة صلاة علي كام آية
علي حبتين تواضع مزيفين و مفقوسين، تكمل النصباية..
و اللي قلبه اسود مفقوس مفقوس و لو بعد حين .. بس مشكلته انه من كتر ما بيمثل ناس كتير
بتتخدع فيه ، و علي ما يبان بيبقي دهس ناس كتير ..
ما كنتش أعرف برضه أن ابو قلب اسود ده ما بيعرفش يحب و لا بيعرف يتمني الخير لأي حد ..
و يظهر أن من كتر ما اتربينا أن الدنيا بلون واحد هو "الأبيض "
، محتاجين وقت علشان نصدق أن فيه "رمادي " و "كحلي" و اكيد "اسود" ..
الناس دي لولا ستر ربنا " لابتلعونا أحياء عند احتماء غضبهم علينا،. (مزمور ١٢٤: ٣) " ..
منهم فرعون اللي ذل شعب الله سنين ، و منهم شاول اللي حاول يقتل داود جوز بنته ميكال ،
و لما عرف انه استخبي عند اخيمالك الكاهن أمر دواغ الادومي بقتله و معه ٨٥ كاهن ( ١ صموئيل ٢٢) ..
و من ده كتير في حياتنا بس بدرجات متفاوتة ..
الناس دي حلها الوحيد ستر الهي ، و ساتر سماوي بيننا و بينهم ..
و الاقوي فيه الاقوي منه ..
و صدقت كلمة الله "إن رأيت ظلم الفقير ونزع الحق والعدل في البلاد،
فلا ترتع من الأمر، لأن فوق العالي عاليا يلاحظ، والأعلى فوقهما.. (الجامعة ٥: ٨)