الكبران وعلاماته!

[Rena Jesus]

الكبران وعلاماته!
* كتبته د. مارلين بسطوروس




1. تعريف الكبران
هو محاولة مستمرة لحين أن نفارق الحياة، لفهم الحياة والنفس والاخر.
التواصل الافضل مع الآخر في إطار حب، وحدود واضحة.
رحلة سعي أن أكون نفسي، وما خُلقت لكي أكونه، ولكي أفعل.
رحلة نمو، ونضوج، وتطور في تعاملي مع الاشياء، كالوقت، والمال، والجنس، والمرح الحقيقي.
رحلة أسعي فيها للرقي بقيمي الخاصة في الشفافية، الانضباط، الصدق، الجدية،
رؤية الآخر كما هو، وقبوله رغم الاختلاف.
رحله يومية، ولكنها أبديه من الاختيارات اللي تساعدني أن أعيش ما أختار أنا،
وليس انفعالاتي ولا ماضيَّ ولا ما يمليه علي المجتمع.
رحله للبحث عن الله بالنسبه لي، ومحاوله فهمه قدر ما أستطيع والتواصل معه.

"كلما كنت قريب من نفسي، أي مشاعري، وأفكاري، أراقبها، أحكم عليها،
أواجهها في ضوء ما اقرأ وما أتعلمه ومع آخرين ممن ينتمون لنفس السكة..........
سكة التعافي مما لحق بي من أذي مقصود أو غير مقصود.
سكة التعافي من قيم، و أكاذيب، تبدو أنها نهج مجتمعي، وقد تنتمي الي سلة المهملات.
سكة التعافي من مراقبة الشر والخير وغيرهم من التسميات والحقائق المحزنة.
سكة التعافي من حب الأشياء، والتعلق المرضي بها الذي ينسيني نفسي، والاخر الذي أحبه.
سكة التعافي من الهروب من تحمل مسؤلياتي، أو تحملها بشكل مرضي، يوذيني ويفقدني التمتع بالحياه، ومواصلة الكبران والتغيير.
سكة التعافي من مخاوف وسيطرة وتحكم واحتياجات تشيء الانسان وتفقدني لذة التواصل معه والاستمتاع به."

2. مظاهر الكبران مع نفسي
أكبر يعني أعرف أفرق بين اللي يتغيير واللي يتقبل.
أكبر يعني قراراتي بتاعتي مش حد بيحركها.
أكبر يعني أعرف أقول إني غلطانة وأعتذر من غير ما احس إنها نهاية الدنيا.
أكبر يعني باعرف احس بمشاعري، وباعرف أعبر عنها وباحترمها وأقبلها زي ما هي لحد لما اكبر أكتر فتتغيير.
أكبر يعني "باختار" أعمل مش "مفروض" أعمل في كتيييير من اختياراتي.
أكبر يعني أعرف انبسط لوحدي وبرده أعرف انبسط مع الناس.
اكبر يعني اعرف أقول لا لنفسي كمان لو حاجة دماغي مش قبلاها
وكمان أعرف أحايلني علشان أعمل اللي أنا عاوزاه ومقتنعة بيه.
أكبر يعني اعرف أقبل إنه فيه حاجات مش هتتغيير، ولازم نقبلها زي ما هي ونبطل نحاول نغيرها.
أكبر يعني اوقات كتير باعمل حاجات غصب عني لاني مقتنع انها مفيدة ليا او لغيري.

3. مظاهر الكبران في علاقاتي
نكبر يعني باعرف أختار كلامي فاعرف أوازن بين الصدق، والتعبير عن النفس، وعدم جرح المشاعر وتوصيل رأيي،
نكبر يعني أعرف أصبر علي الناس تتغير من غير ما افضل أعلق واظبط وأعدل وأقبل ببساطة حدوث حاجات مش مريحة لي
نكبر يعني الخط الفاصل ما بين المواجدة والإحساس بالآخر والتداخل في ظروفه لدرجة تفقدني انبساطي.
نكبر يعني أعرف دوري في مساعدة الآخر بدون السيطرة عليه وعلي ظروفه.
نكبر يعني أعرف إمتي وازاي أتكلم مع الآخر لو عاوزة أساعده يتغيير.
الكبران يعني احترامي للناس، مبني علي انه كل واحد مننا "انسان" مش مبني علي هما مين، ولا ولاد مين، ولا بيعملوا صح، ولا غلط، ولا قداراتهم وامكانيتهم ايه.
هو إني أعرف أرتب الناس اللي حواليا صح، مين ينفع يكون قريب؟ ولحد فين؟
ومين لازم يبقي؟ ويفضل بعيد، ومين يكون زائر؟ ومين يقعد ويريح؟
وطبعا باقصد حجم ومكانة الناس في حياتي.
الكبران يعني اعرف اقول لا، لما الناس تطلب مني حاجات، مش مناسبة لوقتي او طاقتي.
الكبران يعني اعرف يعني "ايه الحب" انه مش بس الدلع، او الابهار، أو المشاعر الحلوة أو الشكل الجميل
الحب هو التزام و قبول و تواصل وفهم .
الحب هو حد شايفني عارفني بعيوبي منبهر بحاجات فيَّ، لكن برضه عارف يشوف، ويعترف، ويواجه عيوبي.
نكبر يعني نبطل نقول هما خلوني، هما عملولي، هي زعلتني، هو عمل وابتدي أقول أنا اخترت.
فاقول هي عملت حاجة تضايقني، وانا اخترت ما ازعلش وما اضايقش نفسي.
نكبر يعني نعرف الأهم و المهم يعني الإنسان أهم من الاشياء والفلوس.
نكبر يعني نعرف نسامح اللي بيغلط في حقنا، لاننا عارفين إن كلنا بني أدمين غلاطين وعندنا مشاكل.

4. مظاهر عامة للكبران
نكبر يعني اعرف أسكت....... أبطل كلام لفترات متفاوته.
نكبر يعني أقرا وأقرا وأقرا في حاجات كتير كل يوم.
يعني أسال، وماتكسفش اني ماعرفش، وأعوز أعرف أكتر.
نكبر يعني ما نخافش نجرب حاجات جديدة، حتي ولو قليلة، ونعرف نستمتع بالتغيير.
نكبر يعني الرياضة مهمة وأساسيه حتي ولو كانت مشي.
نكبر يعني أنا اللي متحكم في الفلوس. وهي مش اماني المادي، او حتي باحاول اعمل كدة.
نكبر يعني باعرف أتكلم مع جوعي وأضبط هاكل إيه وإمتي وحتي باحاول.
نكبر يعني أنا باقول أعمل إيه إمتي، وفيه شكل منظم، لحاجات كتير من اللي باعملها، تقريبا وقتي ملكي.

[Mary Naeem]

مشاركة جميلة جدا

ربنا يبارك حياتك

[walaa farouk]

ميرسي على مشاركتك الجميلة

[Rena Jesus]

ميرسى لمروركم الغالى