13 ألف معجب برسالة شاب تتركه حبيبته لـ«سمنته وفقره»

[Mary Naeem]

13 ألف معجب برسالة شاب تتركه حبيبته لـ«سمنته وفقره»

جذبت رسالة المهندس، الذي يصف نفسه بـ "التخين القبيح"، والذي تركته حبيبته لفقره ورقة حاله، 13 ألفًا و391 معجبًا بكفاح الشاب الذي تحولت حياته إلى الأفضل وتغلب على فقره وسمنته، وخطب فتاة تفوق في جمالها حبيبته التي تركته، نشرت تلك الرسالة على صفحة "Society Problems"، أو مشكلات مجتمعية على "فيس بوك".

بدأ الشاب رسالته قائلًا "عفوًا بس أنا حبيت أبعت رسالة لواحدة قليلة الأصل كنت بحبها زمان وانا متأكد إنها هتشوف الكلام ده.. ولو معرفتنيش أحب أقولها "أنا التخين"، أنا التخين اللى حبك، التخين اللى كان بيشتغل صبى قهوجى وهو فى هندسة عشان يصرف على نفسه وميطلبش من أهله جنيه، التخين اللى كان بيقابلك بابتسامة ويقولك أطلبى وأنا أنفذ.. وهو أصلًا محلتهوش اللضا بس كان بيحوش فلوس من قبضه عشان يخرجك ويبسطك ويجبلك كل اللى نفسك فيه".

وكتب الشاب لحبيبته القديمة "التخين اللى ضرب أمين الشرطة لما رخم عليكى وإتاخد في القسم واتلموا كلهم عليه وضربوه واتسحل عشانك، التخين اللى كان بيقسى عليكى لما تغلطى بس مكنش بيهون عليه ينيمك زعلانة، التخين اللى كان راجل "ليكى" مش "عليكى"، التخين اللى كان بيغير عليكى م الهوا الطاير لأنه كان شايفك عرضه وشرفه، التخين اللى كنتى معاه ممثلة درجة أولى في الحب والرومانسية والغش والخداع، التخين اللى جه اتقدملك وقابل ابوكى وهو لسه في الكلية عشان عايزك في الحلال ومش عايز يغضب ربنا بيكى وكان دايمًا بيتقى ربنا فيكى وبيعامل ربنا فيكى واترفض بناء على كلمتك "لأنه تخين مينفعش للجواز"، شكله وحش مش هتعرفى تتمنظرى بيه قدام اصحابك".

واستطرد الشاب في رسالته قائلًا "فاكرة ابوكى قالى ايه يوميها "أنا استشرتها وهيا بتقول إنك مش أكتر من زميل ليها في الكلية وكمان انتا مش واخد بالك انتا عامل إزاى وهيا عاملة إزاى دى عصفورة بالنسبة لك يابنى هيهيهي عموًام هيا مبتفكرش في الجواز دلوقتى".

وقال "فاكرة لما أمك جابت الشاى وابوكى قالها "لاء كوباية مش هتكفيه اجرى هاتى البراد من جوا هيهيهي"، وكنت هلبسه الصنية في وشه ساعتها بس قولت استحمل عشانها، فاكرة نظرة ابوكى وامك ليا يوميها كانت عاملة إزاى، فاكرة لما كلمتك يوميها وقولتيلى "لأ انتا فهمت غلط انا مبفكرش فيك كزوج انا بس كان بيعجبنى فيك دمك الخفيف وانك بتضحكنى على طول.. ربنا يرزقك بالأحسن منى ومعلش انا مش هعرف اكلمك تانى وهغير نمرة تليفونى.. سلام".

وبدأ الشاب في سرد قصة نجاحه بعد ذلك فقال "عارفة التخين القبيح ده بقى إيه دلوقتى!!.. التخين اللى إنتى دمرتيله حياته ده "خس" وظبط جسمه، وجسمه مش محتاج اقولك عليه لأنك شوفتيه لما جتيلى الشركة عشان تشوفينى، التخين اللى إنتى رفضتيه عشان شكله وجسمه ده، اتخرج وطلع التالت ع الدفعة، واشتغل في شركة مكنش يحلم يوقف قدامها حتى بس اشتغل وبقى من أكفأ المهندسين في الشركة، وبقى رئيس قسم كامل على الرغم من سنه الصغيرة وكلمته بترج الشركة، وبدل ما كان بياخد زمان 600 جنيه في الشهر، بقى بياخد 12000 جنيه في الشهر".

واستطرد قائلًا "التخين ده خطب بنت زى القمر تقول للقمر قوم وانا اقعد مكانك، وعلى فكرة أجمل منك بمراااااااحل، وفوق ده كله محترمة ومؤدبة وبنت ناس وبتحبنى بجد مش تمثيل في تمثيل، وعلى فكرة هيا حبتنى وانا تخين برضو، بس مطلعتش قليلة الأصل زيك لأ دى وقفت جنبى لغاية ما بقيت زى ما انتى شوفتينى كده، وخلاص دخلتنا كمان شهرين".

وقال الشاب في رسالته "أنا حبيت أشكرك بس لأنى لو مكنتش اتكسرت منك زمان يمكن مكنتش وصلت للى انا فيه دلوقتى، ابعدى عنى ومتفكريش تجيلى تانى، عشان ساعتها هتشوفى منى معاملة عمرك ما شوفتيها، أنا معرفتش حد بالاسم ده، عمر ما الشكل ولا اللبس عمل راجل، الرجولة مش بالشكل الرجولة باللى أنا كنت بعمله معاكى".

[virgen mary]

رائع جداااااااااا
ياريت كلنا نتعلم ازاى جراحنا تكون سبب فى نجاحنا وننتصر عليها مش تكسرنا

[M-Mena-M]

لا انا اكتر حاجة اثرت فيا حكاية كوباية مش هتكفية ..هاتليه البراد

يعنى البنت وابوها ! ... لأ ده ربنا بيحب الراجل دة جدا علشان كده بعدُه عن الناس دول


شكرا للمشاركة اللى حرقت دمى :-( .. ..
Good

[Mary Naeem]

شكرا على المرور

[Rena Jesus]

ربنا يفرح قلبك

[Mary Naeem]

شكرا على المرور