مساحة شفاء

[walaa farouk]

كل شخص بيتعرض لقهر او لزعل بيكون عايز حاجه اسمها
( مساحة شفاء )
مساحة الشفاء دي بتكون هدوء من كل اللي حواليه تجاهه
مابيكونش متحمل لمسه من حد
كأنه وقع من على ارتفاع ، كسر عظمه ١٠٠ حته
الشيله الغلط بوجع ، بعاهه
اللمسه بصراخ

مساحة الشفاء بتكون عباره عن
احترام صمته ، تقدير زعله ، احتواء غضبه

ماجيش اطبطب فايتوجع ، فاقوله تصدق انا غلطان !
ماجيش اكلمه فمايردش ، فاقاطعه وانهي معاه الكلام

قدم ليه كوب ماء في الخفاء ، الى ان يتعافى تماماً
وبعدها قوله كل اللي جواك

فكرة اخبط راسك في الحيط بتكون مؤلمه
لانه هو اساسا متكسر ، مش حمل لمسه ، فمبالك خبطه !

للاسف احياناً لما بنحاول نواسي موجوع
ونلاقي منه حدة ، بنزعل
فبنوجعه اكتر
طالما قبلت انك تطبطب
، معلش خلي عندك تحمل وطول بال لاي انفعال او رد فعل مش على هواك
او من البداية اقف اتفرج من بعيد زي اللي بيتفرجوا
ساعتها مش هاتتوجع منه ، بس تأكد ان وجعه هو اللي هايزيد

فكره هطبطب تأدية واجب علشان اكون عملت اللي عليا
فكره خبيثه وبتتحس
لان اللي بيطبطب بجد بيفضل يطبطب مهما شاف او سمع
الى ان يتم الشفاء وتزول المساحه

بس خليك عارف ، ان اللي بيتعافى
لا بينسى اللي قرب ولا بينسى اللي بعد

مساحة شفاء