جومر زوجة هوشع النبي

[walaa farouk]

جومر زوجة هوشع النبي
معنى اسمها اكتمال
هي زوجة هوشع النبي
وانجبت منه ولدين وبنت والبنت اسمها لورحامة
جومر لما يذكر اسمها تفكيرنا يشير لها بالإدانة
خاطئة - زانية - عابدة أوثان - خائنة - ناكرة الجميل
لكن تعالوا نتأمل في شخصيتها ونشوف نتعلم ايه
1- جومر والاستسلام للفساد
والدها اسمه دبلايم ومعنى اسمه طبقات مزدوجة من أقراص الزبيب
بمعنى انه غرقان في الملذات الأرضية وهي اتولدت وجدت نفسها في بيئة فاسدة
لدرجة انها كانت بتبيع نفسها بأجرة أكل وشرب ولبس
لأَنَّهَا قَالَتْ: أَذْهَبُ وَرَاءَ مُحِبِّيَّ الَّذِينَ يُعْطُونَ خُبْزِي وَمَائِي صُوفِي
وَكَتَّانِي زَيْتِي وَأَشْرِبَتِي. (هوشع 2: 5)
2- جومر والجهاد
لما طلب الرب من هوشع النبي انه يتزوج إمرأة زنى وطلب منها
تخيلوا معاي كان ايه تفكيرها
لما واحدة في نظر الكل خاطئة وجالها رجل دين يتجوزها
كان ممكن تقول انا ايه اللي يرميني في حياة شخص يقول لي ده صح وده غلط
لكنها حاولت انها تغير من نفسها
وطلب منها هوشع انها تكون ليه ويكون ليها
حاولت انها تعيش نضيفة لكنها سقطت وتركت زوجها وهربت
3- جومر المحبوبة
أيوة محبوبة لأن ربنا أوصى هوشع أنه يحبها وراح دور عليها في كل مكان
وجدها متقيدة ومعروضة للبيع كجارية واشتراها
4- جومر التائبة
زي ما الابن الضال ربنا جذبه بالجوع والعطش ورجع لنفسه وتاب
وقال " اقوم واذهب إلى أبي وأقول اخطأت يا ابتاه في السماء
وقدامك ولست مستحقا أن أدعى لك ابنا بل اجعلني كأحد أجرائك"
وأبوه سابه يقول لغاية لست مستحقا أن أدعى لك ابنا
ومخلاش ينطق اجعلني كأحد أجرائك
لأنه بالتوبة هيرجع لمكانه الأول
وجومر لما اشتراها هوشع تعاهد معها زي العهد الأول قبل خطيتها
«تَقْعُدِينَ أَيَّاماً كَثِيرَةً لاَ تَزْنِي وَلاَ تَكُونِي لِرَجُلٍ وَأَنَا كَذَلِكَ لَكِ».
لكنها المرة دي قدرت تنفذ وبقيت زي الابن الشاطر اللي رجع بيت ابوه
تعالوا نطبق اللي اتعلمناه
1- مهما كان الوسط اللي انت عايش فيه فاسد لا تنجرف وراء فسادهم
وحافظ على نقاء قلبك وعقلك وحواسك حتى لو كنت انت الوحيد اللي نقي
ربما يخلص الله كل اللي حواليك بسببك
2- جاهد ضد الخطية و حتى لو سقطت قوم ولا تيأس
لأن ربنا هينظر لجهادك ويساعدك ويشيل عنك الحروب لما يشوفك مصمم على القيام
3- اطلب من ربنا وقول له توبني يا رب فأتوب
توبني بأي طريقة حتى لو بعصا التأديب المهم رجعني ليك
4- لما تتوب اطلب من ربنا انه يقف معاك علشان ما ترجعش للخطية
وانت من ناحيتك ابعد عن أي مسببات الخطية وطرقها وأشخاصها وكل ما يخصها