وجعنا محتاج شويه احتواء بس

[walaa farouk]

اوقات الطفل الصغير اللي لسه مولود تلاقيه بيعيط اوي
تقوله مالك. اكيد مش هايرد ويفضل يعيط
تقوله طب جعان .مش بيرد ويفضل يعيط
تقوله طب حاجه وجعاك..مش بيرد ويفضل يعيط


فتقرر تاخده وتشيله وتحضنه وتفضل تقوله بس بس
وتغنيله وتلاعبه وتعمل المستحيل لحد ما يهدي وممكن ينام
اوقات احنا بنبقي كده
مخنوقين بس مش عارفين نرد علي كلمه مالك
ولا عارفين نقول جوانا ايه


ومستنين من اللي قدامنا يعملنا في اللحظه دي زي الاطفال المولودين
شويه احتواء علي احتمال لصراخنا اللي مالوش تفسير
لا عاوزين نحس ان اللي قدامنا زهقان مننا
ولا نحس اننا لازم نكتم وجعنا علشان اللي قدامنا مايتعبش
اوقات وجعنا مش عاوز حلول
وجعنا محتاج شويه احتواء بس