|
 |
 |
 |
|
رقم المشاركة : ( 1 )
30 - 08 - 2022, 10:43 PM
|
|||||||||||
|
|||||||||||
 لما كنت ٩ سنين وبالتحديد فى اجازة اخر السنة، بدأ يظهرلى بقع بيضاء فى وشى .. ناس قالت عطش وناس قالتى نقص فيتامينات... مكانش الموضوع مفهوم وقتها ... بس الحقيقة إنه كان غريب اوى .. طالع فى نص وشي الشمال بس .. وكأن فى خط بيفصل وشي بمسطرة . . مفيش تشخيص واضح ولا علاج صريح ... فى الآخر طلع بهاق... كنت رايحة المدرسة مش عارفة أرد على سؤال "ايه اللى فى وشك ده ؟!" كنت ساعات باخاف أبص على المرايا وأنا نازلة واجرى من قدامها ... الأصعب صحابى بقوا بيخافوا منى .... اللى يشوفنى يقول يععع ... اللى مش عايز يقعد جنبى وبيقول ده مرض بيعدى .... كنت باجرى على ماما واسالها البهاق ده مقرف ؟؟؟؟ تقولى ده جلدك بس لونه متغير حطى ايدك على وشك ؟؟؟ مافيش حاجة .... اسألها تانى طب هو بيعدى ترد لا طبعا الدكتور قالى لاء وانا وبابا واخوكى أهو كويسين ... . بمنتهى البراءة كنت باجرى أقول لصحابى نفس الكلام واقولهم حطوا ايديكم على وشي.. بصوا !!! كان ساعات رد أهل الأطفال وساعات نظراتهم وحركاتهم أصعب من اطفالهم ..... بقيت هادية واحب اكون لوحدى ... وهنا كان الدور الأعظم لبابا وماما😍 كان دور الحب والقبول طول الوقت .. كان خزان حب قادر يخلينى أشوف نفسي جميلة ... بس كنت باشوف نفسي جميلة من جوا بس ... ولسه بخاف من المرايا وباكره الصور... فاكرة انى كنت باتعالج بأشعة ٣ أيام فى الأسبوع " مجرد حل مؤقت علشان الموضوع ميزيدش" ولفينا عيادات ومستشفيات كتيييييرررر بس كانوا مبدعين إنهم يصنعوا ذكريات مبهجة جدا "فى عيادات الدكاترة" وقت مليان حوار ومشاركة ولعب أحيانا ... فى يوم سمعت حد فى الاوضة بيصرخ ... ولما سألت عرفت ان فى أمراض جلدية علاج إنها تتكوى والموضوع مؤلم جدا .. . كانت فرصة لدرس جديد ماما علمتهولى . .. انى "اشكر الله دايما" قالتلى انتى بتاخدى جلسة اشعه اه ٣ مرات فى الاسبوع بس ولا مرة بتتوجعى 🙏🏻... افتكرى كل مرة وانتى داخلة العيادة تقولى شكرا يارب .. . وكبرت باعرف اقول شكرا يارب قالتلى لولا إنك جيتى هنا مكنتيش هتشوفى إن فى ناس وأطفال تعبانين أوى كدة ... لما اللى جوا يطلع اتعرفى عليه وألعبي معه علشان هيبقي مضايق.. وكبرت بادور على الموجوع علشان اصاحبه سن المراهقة كان صعب برضو ... كل البنات جميلة وانا فيا حاجة غلط ... بس كم الحب اللى شوفته وتشكيل الله فيا كل يوم ... خلانى فى أول ثانوى أطلب من اهلى انى مش هروح اخد اشاعه تانى "رغم إنى مخفتش بشكل كامل" وانا ممتنة ليكم طول العمر وحابة نفسي بجد وحبيت المرايا الخلاصة أنت مش متخيل دورك عظيم ازاى فى تشكيل ابنك .. . بأقل الكلمات، وبكل حب بتديهوله.... اوعى تنسي ده🙏 أنت مش متخيل ازى أنت حصن أمان من انهيارات بتتوجه لابنك علشان حاجات مش بايدك ولا بايده باحلم اشوف كل انسان بقلب جميل زي بابا وماما 😍 اللي كانوا صورة جميلة عن أبويّ السماوي .. #تتعاش _مش_بس_تتقال 
|
 |
|
العرض العادي
