شكراً يارب على هديتك اللي مفيهاش غلطة

[walaa farouk]

اهم علامة في الحب
، انك تبطل تسأل نفسك كتير "هو ده الشخص اللي ينفع اكمل معاه
ولا لأ". الحب مابيسألش، ومابيتوهش كتير .
. الحب نظرته بسيطة ودايماً مبسوط وشايف اللي معاه اغلى بكتير من انه يضيعه..

الحب مش بيقارن.. هو ب بيكتفي ويفرح بالموجود،
ويشوفه نعمة من ربنا مش بس مجرد شخص ينفع للجواز ولا لأ..

الحب مش بيقيّم ولا يحط معايير للي قدامه
، لكنه ببساطة بيقبلُه كأنه جزء منه.. بعيوبه بميزاته بلخبطته وتقلباته الكتير ..

الحب مش متردد، هو زي ما تقول حاسب حسبته من البداية
ومقرر يكمل للآخر مهما حصل.

الحب شايف ابعد واعمق من الواقع والظروف،
شايف اللي قدامه بنضارة مختلفة تماماً عن باقي الناس..
شايف تفاصيل في روح اللي معاه يمكن هو نفسه مش شايفها.

الحب بيبقى شايف جمال مختلف في اللي معاه.. جمال مستخبي عن الناس كلها الا هو.. جمال مخليه مبهور ومشدود ومبسوط بوجوده معاه مهما عدى الوقت..

الحب قابل ضعفات اللي معاه وكأنها ضعفاته، قابلها مش بينفر منها زي الباقيين. قابلها ومابيفقدش الامل في تغييرها مهما حصل..

واللي بيحب مش بيقعد يحسب ويسأل "ايه اللي ممكن يخليني احب الشخص ده واكمل معاه؟ "، لكن سؤاله واستغرابه دايماً بيبقى في الجملة دي.. "هو انا ينفع اصلاً حياتي تمشي من غير الشخص ده!"..

وكأن الله "مفصّل" القلوب على بعض، ماتفهمش ليه وامتى حصل الحب ده.. وازاي الموضوع يكمل، لأنه ببساطة العقل مش هايعرف يحسب تفاصيل القلب، العقل بس يقف مستغرب من ترتيب الله ويقوله بإمتنان "شكراً يارب على هديتك اللي مفيهاش غلطة"..