نظرية الصحراوي

[walaa farouk]

هل سيارتك عطلت مرة في الطريق الصحراوي ؟؟
و لا حد ح يقف لك او يسأل فيك ؛
كله بيجري و ما حدش لا فاضي لك و لا فاضي لغيرك
. كله طاير علي الاسفلت و انت مش في محطة اهتمام اي حد ..

و لو عشمت نفسك و استنيت حد يساعدك ، ح تتعب قوي قوي ،
الا لو ربنا حنن قلب حد عليك ووقف يشوفك عاوز ايه ،
و ده بسبب رحمة الله بس ..

الدنيا بقي زي الطريق الصحراوي ..
لا حد فاضي لك و لا حد ح تيجي علي باله الا صدفة او لو محتاج لك في مصلحة ، او لما ربنا في محبته يحط في قلب حد حبة حنان عليك .

الايام كده : اوعي تزعل او تتعشم او تتعب . هي الناس كده
، كله بيجري ، لا حد ح يستناك و لا انت تستني حد .

حتي اقرب الناس ، فيهم الطبع ده ..
ح تلاقي اصحابك كده وولادك كده و قرايبك كده
، و حتي ولادك ح ييجي لهم يوم لما يكبروا و يسيبوا البيت يبقوا كده و ينشغلوا عنك في دنيتهم، و يمكن ييجوا يزوروك كل جمعة "لو افتكروا" !!

يبقي لا تزعل من حد و لا تزعل حد ..

و لو عاوز تريح و ترتاح ، لا تتعشم و لا تعاتب و لا تستني حاجة . لو الناس سألوا يبقي رضي ، و لو ما سألوش او ما اهتموش ح يبقي ده هو تمامهم و طبعم، او السوفت وير بتاعهم و بتاع اهل الدنيا كلهم ..

عارف ليه ح ترتاح ؟؟ لانك طلعت اقوي منهم و من الزمن ، طلعتهم بره توقعاتك ، و استغنيت بكرامة عن الكل.

مش بس كده ، ده علشان ما تدخلش في "حفرة الوحدة " و "العزلة" و "الحسرة" و علشان "تتقوي اكتر و اكتر" ،حب و اسأل واخدم الكل و ما تستناش من حد اي رد فعل علشان ما تتصدمش ؛ انت بتعمل كده باصلك و لنفسك و لامانتك امام الله : يعني تخللي الناس هي اللي مستنياك و محتاجة لك مش انت اللي محتاج لهم ..

و ح تستغرب قوي لما تعمل كده ، لانك ح تلاقيهم هما اللي جريوا وراك لما ترميهم وراك ..

تجربة صعبة في الاول ، بس تستاهل انك تجربها و تشوف نتائجها .

و سلم لي على الصحراوي !!