محتاجين نكون زي مارمرقس

[walaa farouk]

عارفين بولس الرسول ؟
اه اللي كتب ال ١٤ رسالة اللي كلنا عارفينهم
ده بقي كان راجل واخدها جد اوي .. في يوم قفش علي مرقس الرسول
اه مرقس اللي جه بشر عندنا هنا ... وقاله انت ماتلزمنيش في الخدمة اع ١٥ : ٣٦ ، ٣٧

بتخيل لو مرقس الرسول بعد ما بولس رفضه.كتب علي صفحته علي الفيس ( قصدي في إنجيله) وقال قدام كل الناس ....

(ادي بولس اللي كنت فاكره اب وحنين ورسول وكارز.أهو رفضني وطردني وقال اني مانفعش. نسي نفسه شاول. نسي نفسه اللي ساهم في قتل اسطفانوس هما كل الرسل كده طالعين فيها انا مش داخل كنيسة بيخدم فيها بولس تاني) ......
وبدأ مرقس، يهاجم الكنيسة والرسل لمجرد أن بولس رفضه ويشير اي غلطة ليهم علي صفحته( يوووه قصدي في إنجيله) .

لكن مرقس طلع جدع وماعملش كدة ماقلش بولس أعثرني في الكنيسة وفي كل الرسل وانا مش مكمل خدمة ...

لكن في الحقيقة مرقس بعد ماحس بالرفض قال في نفسه
انت ياربي يسوع برضوا اترفضت وحاسس بمشاعر الرفض فساعدني يارب.

وفضل ماسك في ربنا وبدا يخدم في حتة تاني بعيد عن بولس

وتمر السنين ويكتشف بولس ان الدنيا مش قفش كدة وشاف ان مرقس اللي كان مستصغره طلع خادم حقيقي وكارز كبير بس كان عاوز القائد اللي يساعده او يوجهه
وفي اخر رسالة لبولس قال لتيموثاوس انا محتاج مرقس هو اللي هاينفعني.. ٢ تي ٤ : ١١

مين فينا كده النهاردة يوم ماتحس انك اترفضت في خدمة او مكان. تفضل ماسك في المسيح و خدمة ولاده.
مرقس اعتبر ان رفض بولس ليه قوة لخدمة أكبر.
النهاردة لو اي حد فينا اتجرح في الخدمة في الكنيسه يطلع يقول انا هاسيب الخدمة في الكنيسة.
مافيش فينا مرقس اللي يترفض ويفضل ماسك في ربنا فيرجع بقوة وكرامة اعظم.

احنا محتاجين نكون زي مارمرقس لو اترفضنا نفضل ماسكين في ربنا والكنيسة
والقائد والخادم اللي رفضك النهاردة فبسبب امانتك وتمسكك بكنيستك اكيد هايعرف غلطته بكرة