كان ليا واحد صاحبي زمان .. كان غالي عندي .. عمل حاجه زعلتني وجرحتني .. وبعدنا عن بعض .. فضلت لوقت كبير كل ما اشوفه اتضايق وامشي م المكان اللي انا فيه .. ولما ييجي علشان يسلم اقوم واسيب القعده .. وارفض حتي اني اسلم عليه من بعيد .. لكن دلوقتي وبعد ما عدا ع الموقف ده أكتر من سنه .. لما بشوفه صدفه بسلم عليه وبحضنه كمان ..
زمان لما كان لسه فارق عندي كنت زعلان منه .. وعلي أد المحبه علي أد ما بيكون الزعل .. لكن مع الأيام لما غلاوته راحت و مبقاش يفرق .. بقيت بتعامل معاه عادي .. وأقل من العادي .. لأنه خلاص دلوقتي بالنسبالي مجرد ( غريب ) ..
اتعلمت من الموقف ده حاجات كتير ..
اتعلمت ان كل ما كانلك حد قريب منك بيعاتبك وبيخاصمك وبيزعل منك اعرف انه بيعمل ده لأنه بيحبك .. ولأنك فارق عنده .. لكن بمجرد ما عتابه يقل ويبطل يزعل منك مهما عملت يبقي غلاوتك اللي ف قلبه خلصت مع الأيام .. ومبقاش ف قلبه ليك نفس الشغف والحب بتاع زمان ..
لما تزعل من حد بتحبه ويصعب عليك منه يبقي انت لسه متمسك بيه ..
لسه عايزه ف حياتك ومحتاج لوجوده ..
لكن لما تبطلوا تتعاتبوا وتتخانقوا وتتضايقوا وتزعلوا من بعض ..
لما كلامكم يبقي هادي وبارد .. واللقا يبقي مطفي ومفيهوش مشاعر
اعرف ان علاقتكم خلصت ووصلت لأخر مشهد فيها ..
المشهد اللي بتتحولوا فيه ( تلقائي ) من اتنين قريبين من بعض ل اتنين اغراب !
