ربنا يحليك

[walaa farouk]

١٨٩٨ اترسمت صورة ليدى غوديفا ..واحدة عريانة على حصان بتتجول في المدينة تخليدا لقصة إنسانية ..طبعا كل اللى شافها لعن صاحبتها على اللى رسمها واعتبرت قبح فنى و إباحية و ايه المسخرة و قلة الأدب دى 🙆🙆..بس الحكاية فيها حلاوة و جمال إنسانى رهيب .
.الحكاية أن الليدى غوديفا زوجة حاكم إنجليزي في القرون الوسطى اثقل الشعب بضرائب وكان يحكم بنار و بقضيب من حديد
..انهك الشعب جدا ..حاولت زوجته أن تثنيه عن قسوته ..علشان يريح نفسه قال لها لو مشيتى عريانة وسط الناس حخفض الضرائب و ارحم الشعب ..
فامتطت حصانها و سارت عارية ..بلغوا جوزها مراتك عريانه في الشوارع ..حط أيده على رأسه و قال يادى الفضيحة ..الشعب شاف مراتى عريانة ..فاجابوه ..لما الشعب عرف لماذا تعرت و أن هذا العرى من أجلهم ..أغلقوا الشبابيك و امتنعوا عن النزول و أنها تتجول في شوارع خالية ..لأن الله اعلن جمال روحها فسترها الناس بعيونهم ..
كل واحد فينا فيه منطقة قبح ..ممكن يكون في الجسد .
.و في الطباع ..و في الروح بالسقوط و تشويه الخطية .
.ممكن تشوف مراتك أو تشوفي جوزك قرد 😅 أو تشوف ابوك هولاكو و امك ريا و سكينة 😂 ..ممكن تشوف مخدوم أنه ما فيش فايدة و أنه ابن الهلاك ..القبح بنعيشه كل يوم ..في خيانة ..في ظلم ..في صراع على المادة و الفلوس ..في علاقات زايفة ..في تملق ..في تسلق .. في طباع خشنة و قسوة .. في عدم رحمة ..و كتير الواحد لما يقرب من التناول يبقي كاشش و خايف أنه يتقدم من قبحه ..و ازاى الواحد يتجاسر و ياكل من القدسات اللى هى للقديسين ..
فيه في سفر يهوديت (من الأسفار القانونية التانية ) أية تقول أن ربنا يقدر يحليك ..
وَزَادَهَا الرَّبُّ أَيْضاً بَهَاءً مِنْ أَجْلِ أَنَّ تَزَيُّنَهَا هذَا لَمْ يَكُنْ عَنْ شَهْوَةٍ بَلْ عَنْ فَضِيلَةٍ، وَلِذلِكَ زَادَ الرَّبُّ فِي جَمَالِهَا حَتَّى ظَهَرَتْ فِي عُيُونِ الْجَمِيعِ بِبَهَاءٍ لاَ يُمَثَّلُ. سفر يهوديت4:10
لما تاخد قرار انك تعيش في سكة ربنا ..ربنا يحلى القبح اللى فيك ..ربنا يظهر جماليات جواك .. عارف جواك تقول ياسلام ده خادم حلو ولا ساعى بريد شاطر و انت لمؤاخذة مش عارف زبالتى ..علشان ربنا بيدى بهاء للاكليروس ..بيحليهم علشان قبحهم ما يظهرش و جمال يسوع اللى يظهر .. اه مراتك مش حلوة و تخنانة حتبططك 😅..اه جوزك بيشخر و عصبى و مابيعرفش يقول كلمتين حلوين و مش زى جورج كولونى 😂 ..ربنا بيحليكى في عينيه و يديك بهاء يغطى جمال جسمك في روحك في خفة دمك في طيبته في جدعنته ..ربنا بيحلى ولاده ..ده اللى كرز للعالم الجهلاء و المزدرى ..و دى مناظر ؟! ربنا يحليك ...طيب القدسات للقديسين ..اتناول ازاى بالقبح ده ..ربنا بيحليك ..طول القداس الروح القدس شغال ..ياخد من بر المذبح و يديك و باخد زبالتى وخطيتى و يحطها على المذبح ..فيتقال في التسبحة اخذ الذى لنا (قبح ) و اعطانا الذى له ( حلاوة )
..فتتناول في اخر القداس ما هو خلاك قديس تاخد القدسات ..ما بتعرفش تقول كلمتين زيي ..ربنا يحليك.."لأَنْ لَسْتُمْ أَنْتُمُ الْمُتَكَلِّمِينَ بَلْ رُوحُ أَبِيكُمُ الَّذِي يَتَكَلَّمُ فِيكُمْ." (مت 10: 20) و تطلع كلمات دهب من شفتيك ..ربنا بيحليك ..بس اوع تبقي خايب و تنسب الحلاوة لنفسك ..لانه لو رفع البهاء ..لو اتمسح المكياج و ظهرت الحقيقة ..اى قبح سيرانا بيه الناس ..حلوة كلمة سترنا ..ما فضحناش ..و ممكن سترنا يعنى غطانا ..لبسنا ..حلانا ..
"لأَنَّ كُلَّكُمُ الَّذِينَ اعْتَمَدْتُمْ بِالْمَسِيحِ قَدْ لَبِسْتُمُ الْمَسِيحَ:" (غل 3: 27).
لو بتعيش القبح في حياتك ..صلى ربنا يقدر يحلى حياتك ..تواجد في حضرة الروح القدس أطول فترة ممكنة بصلاة بمزامير بتسبيح بكلمة ربنا بخدمة بحب بغفران ...و حتلاقي الروح بيحليك ..دى اصلا شغلته ..أنه يحلينا في عين الاب السماوى فيكون لينا نصيب ..و اطلع فوق و يتنده اسمى .....