اقوالكم اشتدت علي

[walaa farouk]

«أَقْوَالُكُمُ اشْتَدَّتْ عَلَيَّ، قَالَ الرَّبُّ. وَقُلْتُمْ: مَاذَا قُلْنَا عَلَيْكَ؟ (ملاخي ٣: ١٣)

فيه كده كلام "طعمه" مر ، يترمي بلا حرص، يبوظ ليلة و يخرب عيلة ، يدمر نفسية و يحطم شخصية ..

من نوعية : بطل غباء ، انت ما بتفهمش، قلبك اسود ، انت مش محترم ، انت ما اتربيتش و قليل الادب ، خسارة اني عرفتك ..
و اللستة طويلة و فيها كلام لساني ما يقدرش يقوله ..

كلمات من النوع ده تطلع بلا حساب و تهدم وراها علاقات ..

ده أحيانا تبقي الكلمة "شكلها " و "لفظها" مفيهوش غلط ، بس زي الدبش تعور اللي قدامك ، و ما يتمسكش علي قالها خطأ اللفظ !!

كلمات قاسية و تقيلة و محطمة و جامدة و جاحدة ، كلها بتوصل رسالة واحدة "انا لا بحبك و لا طايقك و لا عاوزك من أصله" ..

كل بصة عين و نبرة صوت و تكشيرة وش بتقول للي قدامك "انت مش حلو في عيني "

و فيه ناس تاني حلوة بزيادة ، كل كلامها و نظراتها جميلة و مريحة. حتي صوتها حلو ، و طبعها احلي ..

ناس العيبة ما تطلعش منها ، و لو حست بس ان فيه احتمال حد يكون زعل ، تطيب خاطره في الحال ، و لا تسيبوش لحظة زعلان ..

و ما بين نوعين من الناس انقسمت الدنيا ..

و ربنا يبعد عننا أصحاب اللسان المر ، و يرزقنا برزق معرفة الناس الحلوة دي ..