بعد فوات الأوان كلمة تهز الكيان كلمه مليانه بالندم والحسره

[walaa farouk]

بعد فوات الأوان ؟؟

كلمة تهز الكيان كلمه مليانه بالندم والحسره
وملهاش للأسف حل ولا علاج ولا اياً كان .

ابعدوا نفسكم من اجل نفسكم عن (بعد فوات الأوان)
مثلاً والامثله ملهاش حصر !!
لما حد بيكون تعبان تعب شديد بنحاول نزورهُ
ولو مش بنكلمهُ او زعلانين معاه بنفكر نكلمهُ ! بنفكر مش بنفذ .
. وبنفضل نأجل فى مشوار الزياره وغالباً مش بنروح ويفضل العقل يسرد
ويعيد ويزيد فى اسباب الزعل ؟ والقلب بدال ما يحنو يقسو ومش بنتكلم ويفضل الزعل!!
ويجى ربنا يسترد وديعته وينتقل الشخص التعبان ده . وساعتها بنسيب الدنيا كلها وبنجرى نعزى
ونبص للأصول والواجب والعادات ؟؟
طب ماهو سافر خلاص
هايفرق ايه بقى العزى او الواجب . الشخص نفسه مشى يعنى لو زعلان منك مارتحش .
ولو هو اللى مزعلك فاتت الفرصه اللى مابترجعش .
يعنى لو واحشك او نفسهُ يشوفك خلاص مابينفعش .
يعنى خلصت خلاص حكايته معاك على كده !! سواء
كنت غلطان فى حقه او هو كان غلطان فالاخر مافرقتش ..
بس المحصله ندم وياريت وكلمه ياريت متعبه بتزود الأحساس
بالألم بتزود التعب ومابترحمش
يبقى ياريت مع الموجودين اللى لسه فالحياه عايشين ننسى الزعل او على الاقل نجنبه
،ُ فوات الأوان صعب جدا ومش مع الاشخاص الأقرب للموت او فى حالات مرضيه ،
الموت مابيختارش ولا بيفرق .. الموت قريب وفى لحظه بتبقى مش مستوعب !!
ياريت لو حد زعلان او شايل يسامح حتى لو مش هايتعامل بس يسامح .
. افتكر ولو للحظه ان الشخص ده فارق الحياه او العكس
، افتكرله الحلو وماتكرهوش ولو مش قادر تنسى حاول تسامح ..
اللى معاه اب او ام اخ او اخت زوج او زوجه ابنه او ابن صديق قريب
حبيب زميل كل الناس (حب قريبك كنفسك)
قدم للكل حب قدم على اد ماتقدر . قبل فوات الاوان
والاهم تكون مسامح ومطمن انك عند غيرك ماكنتش جارح ..
مقابله ربنا بقلب مسامح تفرق كتير وتشيل من عليك اكتر .
محدش عارف مين رايح الاول اعمل حساب بكره لنفسك اصل بكره ماضمنش ..
متأجلش اتصال ولا تنسى السؤال ارضى ربك وبعدها ضميرك وقلبك واخرهم ارضى الناس والاعراف والتقاليد
حط قدام عينيك ان النهارده فى ايديك انما بعدين ده فى ايدين مين ؟
ربنا يدينا كلنا قوه وقلب مسامح .
ربنا يبعد عننا احساس بعد فوات الاوان
ربنا يساعدنا كلنا اننا نرضيه من الأن
اننا نكون مستعدين نقابله واحنا مفرحين قلبه .

[Mary Naeem]

مشاركة جميلة جدا
ربنا يبارك حياتك