من فضلك بإستمرار فكرني

[walaa farouk]

من وقت للتاني بصلي وبطلب من ربنا طلبة غريبة شوية بقوله "فكرني"

فكرني انك بتدير حياتي بتدبير صالح ودقيق ، واني مش متساب لعشوائية الاحداث والظروف .

فكرني اني تحت عناية إيد الله القدير .
فكرني ان خير ورحمة يتبعاني وانا معاك بسير .

فكرني ان كل صدمات حياتي رغم صعوبتها والامها انت قصدت بيها خير واستخدمتها وهتستخدمها لتشكيلي ونموي و تحسين بصيرتي .

فكرني اني محبوب في عينك ، علشان ماعملش مجهود رهيب علشان اشوف الحب في عيون الناس وفي الاخر مش بلاقيه .

فكرني اني ماخسرتش لما قررت اطيعك و اطيع مشيئتك .

من وقت للتاني بحتاج يفكرني ويقولي تاني وتالت ورابع .. وخاصة في الوقت اللي بيهجم عليك عواصف الشكوك و رياح الخوف و ذوابع الوحدة و تحس بالرعب ان مالكش ضهر ومالكش سقف .. لكن بمجرد ما روح الله يفكرك تاني ويبعت لك سحابة من المجد تظلل عليك و تحتضنك في ضعفك بيترد فيك الروح تاني وتكمل بكل قوة .

طبيعة الانسان انه بينسي بسرعة ، فمن فضلك بإستمرار فكرني .