رقيق المشاعر

[walaa farouk]

فيه ناس مصابه بحاجه اسمها " رقة المشاعر "
الناس دي بتتولد بالموضوع ده
وللأسف الموضوع ده ملوش علاج غير الاحتواء
وانك تنقي الفاظك وانت بتتكلم معاهم

الناس دي من اقل كلمة بتتعب ومن اقل تصرف ممكن تعزل نفسها لأيام ويمكن لشهور
الناس دي ممكن الزعل يوصلها انه يدخلها في دور اكتئاب ويظهر على جسمها بسببه بقع زرقا
الناس دي ممكن تمتنع عن الاكل بسبب كلمة ، بسبب موقف ، بسبب حركة

الناس دي مالهاش اي ذنب في اللي هم فيه غير انهم بيحسوا بكل كلمة بتتقال سواء ليهم او لغيرهم

الناس دي مش قماصه ولا بتحب الزعل
الناس دي حساسه جدا وعندهم قلب كبير
ممكن يزعلوا علي مشاكل غيرهم ويدخلوا في نفس الدوامه وكأنها حاصله معاهم

بيتولدوا بالموضوع ده ، وبيفضل ملازمهم من الصغر للكبر

للأسف ، فيه نسبة قليله جدا بتقدر تتغلب على الداء ده بسبب كتر اللي اتعرضوله في حياتهم ، وبيبدأوا يتحولوا لأشخاص تانيه
يردوا عليك الكلمة بكلمة والموقف بموقف والجرح بجرح
ويمكن اقوى كمان ...
لان اللي شافوه خلق منهم شخصية جديده ، شخصية عنيفه حابة تخرج من دايرة الكتمان لدايرة التعامل بالمثل

ارجوكم بلاش يتحولوا بسببكم ، خلوهم يعيشوا وسطينا بقلوبهم الطيبه
ياريت تكونوا حريصين جدا في كل كلمة معاهم
لأنهم لو اتحولوا ، انتوا اول ناس هاتقاسوا رد فعلهم وسوء اسلوبهم اللي هم نفسهم مابيكونوش راضيين عنه

[Haia]

الحرص واجب طبعاّ