الشباب على النت
طبعا العمر يتراوح من 22 الى ما فوق ... وتلاقيه اول ما يدخل هاى ممكن
نتعرف انا فلان ومن الحته الفلانيه وتحسى ان فيه حنفيه معلومات اتفتحت
واى حاجة تقوليهاله يقولك يعنى ايه مش فاهم وبعد كل كلمة يقولك اصل
انا لسه جديد فى النت
والنوعية دى تنقسم لقسمين :
1- يا اما متحمس وحط ف دماغه موضوع النت وعايز يتعلم
2- يا اما سمع من صحابه عن النت والبنات وجاي يجرب حظه
المرحلة الثانية :
( الى بيقعد على النت بس مش كتير)
النوع ده كل كلامه انا مشغولياتى كتير ومبحبش النت والكلام ده وبعد ما
يكلم شوية يقولك ممكن نكمل كلام فى التليفون انا اصلى مبدخلش النت
كتير ومليش خلق للكتابة والحاجات دى
والنوعيه دى تنقسم الى قسمين :
1- يا اما يبقى لحوح ويفضل يطلب نفس الطلب وصباح الملل
2- يا اما يبقى عنده عزة نفس وميلحش بس هيتعصب وهيقولك اعمليلى بلوك
المرحله التالته
( الى قاعد على النت ليل نهار)
ده بقى شرحه يطول وينقسم لعدة انواع
1- المقموص
ده بقى قاعد وحاطط ايده على زرار الزعل اي حاجة تقوليها تبقي بتقصديه
او بتقللى من شانه وبعد كام مرة كلام ممكن يقولك ادينى نمرة تليفونك
ولما تعتذرى هيقولك انا هحترم رغبتك وهيركبلك الوش الخشب ومن وقت
للتاني هتاخدى البلوك ف وشك فنصيحه من اولها كده اديله بلوك وديليت
2- ابو دم خفيف
ده شلل مركز ومتعرفيش مين الي خدعه وقاله ان دمه خفيف وكل كلامه قفشات
وضحك والمفروض انك تكونى مجامله وتضحكى بس منصحكيش تيجى على اعصابك
3- المودى
دى بقة شخصية بتتنوع كل يوم على حسب المود وهتحسى انك بتكلمى واحد
عنده انفصام ف الشخصية النهاردة رزين وعاقل وبكرة لاسع وبعد يومين رخم
وبعدها كيوت وفريندلى طبعا الحكايه مش ناقصة جنان كفايه الى الواحد
فى
4- اللزقه
والنوع ده عايز حزم ف التعامل معاه لأن كل
كلامه انتى فين ؟؟
بتتاخرى فى الرد ليه؟؟
انتى بتكلمى حد ؟؟
ياعم وانت مالك بتتحشر
ليه ......ولو قلتيله ثوانى هيقولك ليه رايحة فين؟ متتاخريش ... ايه
ده انتى لسه مجيتيش ؟؟؟
5- الناصح
صباح الصداع مع كل جمله هتقوليها هتاخدى نصيحة وفيه عرض خاص قولى
جملتين وخدى اربع نصايح العرض مستمر حتى نفاد الكمية ........ولو على
منتدى زينا كده هتلاقيه بيقولك ليه حطيتى التوبيك ده وليه شيلتى
الصورة دى وحطيتى التانية انا انصحك انك تخليه يحصل اخواته الي فاتوا
يعنى بلوك وديليت
6- دون جوان
انا فيا جاذبية وكل البنات بتعجب بيا ....... ايام ما كنت ف الكليه
كنت عامل ازمه والبنات بتتخانق عليا...... المصيبة بقى ان اى جمله
هتقوليها هيفهم ان انتى معجبه اصله مش بمزاجك هتحبيه يعنى هتحبيه
7- محروم بنات
ده بقى لو فى منتدى او ميل جروب تلاقيه مركز على كل البنات ومبيعملش
اي حاجة تانية غير كده الكوميدى بقى لما يتلخبط ويعتقد ان الأسم ده
انثوي ويندمج وبعدين يطلع واحد صاحبه
8- الكدااااب
من اول الأسم والسن واى معلومة خدتيها كدب فى كدب ومتعرفيش ليه ده بقى
انصحيه وخليه يغير اسمه على الماسنجر ويخليه مسيلمة الكداب
9- العبيط
ده هتلاقيه على طول حاطط صورته وذنب عليكى تتفرجى ويشيل الصورة دى يحط
التانية وكل شوية يفتح الكاميرا مع نفسه
10- بابا اوبح
ده ممكن يكون على النت من سنة 96 واتخرج واشتغل واتجوز وجاب عيال ولسه
قاعد يتعرف على بنات وكل ما يكلم واحدة يقنعها انه مش متجوز وبيدور
على عروسة وصباح السرحان ولو جربتى كل يوم تدخليله بايميل غير التانى
هتسمعى قصة حياته كل يوم مختلفة
