جيل محبــــــــــــوس..

[Mary Naeem]

جيل محبــــــــــــوس..



ياجيل قادم ياجيل محبوس..ياجيل بتحارب الفيروس..
ياعايش اختبار اجبار ملوش منهج..ولاينفع تخدله دروس

ياجيل واعد..ومتكمم..ومتعقم..ومتباعد..
ولا بتلمس..ولا تسلم..ولا بتبوس..

ياجيل جامد و بتواجه وتتعلم..
ورغم المحنه لا بتأيس ولا تسلم..
وكل شيئ عليك محذور..
ياجيل فاهم و متفهم..ومتأقلم ..وعندك دور..

ياجيل محروم من الزيارات..
وم الفسحه وم الرحلات..
ولانادي ولاتمرين ولا اصحاب..
ياجيل ممنوع تفوت م الباب..

رايح بيه فين يامستقبل ..وقولي ازاي هيتحمل..
وقولي ازاي هيتأمل..ويبقي عنده اي طموح..

وكل حياته واهتمامه من غير حس ..من غير روح..
ومن غير شم.. ومن غير طعم..وتكسير جسم..
وقولي ليه كبر ف السن وهو لسه بيسنن..مشافش النور..

ياجيل مكموم..ياجيل بتنادي وبتحلم بصوت مكتوم .. متقلقش احنا سمعينك..
ياجيل خايف ومتوتر ومتحير ومتضرر.وكله لوقت غير معلوم.. قلوبنا معاك و حسينك

ياجيل بتواجه استثناء ..
ياجيل بتعاني من أعباء
ضحيه لثورتين ..و وبااء
وباء تعليم..وباء اخلاق..وباء فيسبوك ..
وباء لعيال بتترقص وبتهلس علي التيك توك ..
وباء لوك لوك ..وسناب شات..وباء اشاعات..
ضحيه لأهل بيتاجرو بأطفالهم .. وبراءتهم .. ضميرهم مات..

وقولي ازاي هقولك لأ..واعلم فيك واربي فيك..
وازرع قيمي من جواك..ومش قادر اغمي عنيك..في كل مكان

ترند بطانه الفستان.. سباق مولد سيدي العريان.
كلام خادش وغير لائق..كبار مشاهير وع الميديا بتتخانق

ترند لطفل ال عاشق وأبوه موافق ..حاجه تضايق..

خلاف في الدين.ومتناقضين.تصدق مين؟...
مصارعه ف حلقة التوك شو لناس ف الرأي مختلفين

ترند لناس بتتريق وتتنمر..حوادث بشعه ف المنظر بتتشير
فضايح ناس بتتصور..وتتشهر..
ومين ظالم ..وفين الحق.. وقولي ازاي هقولك لأ..

وقولي ازاي هكون حافظ طفولتك فيك ..
وكل الدنيا جايه عليك ..وفيك حرمان وقلب حزين..
ياجيل غلبان ..ياجيل مسكين..
ياجيل نصه..ضحيه لأب وأم منفصلين..ويختار مين..؟
وعايش حرب نفسيه ..ورفع ف دعوي وقضية مابين لاتنين وناقصه حنان.. وعنده حنين..
وقولي يحسو بيك ازاي ..وقولي هيفهموك ازاي..
وامتي يعني حسو بيك..وامتي كانو متفاهمين..!

وقولي ازاي هقولك عيب وميصحش .. وبطل زن او الحاح
وكل حاجه ادامك سداح ومداح..
ياجيل مستني اي لقاح..مصيرك بكرا راح ترتاح..وتتقدم لاتستلم..
واصنع جسر.وطوق.وجناح.. يعدو بيك لبر نجاح..
وشجع مصر ..وشوط ياصلاح.. وحيي صلاح..
وشيل قلمك دا اغلي سلاح..

واتعلم..وانجح ف العلام عن بعد..
واكسر كل حيطةوسد..وحقق كل غاية ومجد..
وعيش ف امان..

دا احنا املنا كله فيك..امل عملاق..امل كسبان..
امل بيهدد الاوطان..

امل بيخلي أعدائنا تموت م الرعب والاحزان..
دا انت كل مواردنا..وانت كل ثروتنا..
وطاقه و طفرة هتغير مسار الكون..

وكله يهون..
وكل محنه مرت بيك.. مسيرها ف وقت هتقويك..
وتتعدل..وكل حاجه راح تأذيك هتتبدل..

دا انت جيل سابق سنك..بموهبتك مع فنك.. وبخيالك..وتفكيرك.. ونقصك بس نؤمن بيك بأبداعك..بتعبيرك..وتلقي بس تقديرك..

وكله يهون..
مدام ف رب بيدور امور الكون..
وقادر ان يقول لشيئ كون فيكون..
فلازم تبقي مطمن ..دا رب العزة متمكن..واعلم بيك..
دا هو لوحده هيهون دا كله عليك..

فأوعي تخاف..واوعي تضيع..
واوعي تبقي متردد وتتأخر..

ياجيل اقوي مايتصور ..
عشانك بس هنقرر ونتغير..
وهنفكر شويه فيك..وهنعليك..وننهض بيك..
وتبقي بلدنا ف القمة..ويبقي الفخر لينا وليك.. ياجيل قادم