احتفل بالحياة

[walaa farouk]

ياعزيزى معضلة الحياة هى فى اعتيادها، اعتياد وجود الحياة بكل ما فيها من تفاصيل. اعتياد وجودنا احنا شخصياً "البنى آدم"! اعتياد الأماكن والأشخاص، وضمان وجود يوم تانى، ضمان وجود بُكره والسنة الجاية!

لكن خلينى اقولك إن اغلب الحاجات إن لم يكن كلها مش مضمونة البقاء، وبالتالى تحتاج للإنتباه ليها مش الإعتياد عليها. فكل يوم فيه أكثر من ميلاد و أكثر من موت. الكثير من الاستقبال والمزيد من الوداع!

الفكرة فى اننا "اعتدنا" .. اعتدنا انه من الطبيعى اننا نصحى من النوم، وجسمنا يتحرك بشكل طبيعى. وناكل كل انواع الأكل اللى عايزينها من غير أى عائق. واننا بنسمع كل الأصوات اللى حوالينا، ونشوف كل الألوان. واننا نقدر نلمس اوراق وردة ونشم ريحتها.

عارف يا عزيزى الإعتياد بيعمل ايه؟! الإعتياد بيقتل الحياة! ايوه بيقتلها، لأنه بيضيع علينا فرضة ملاحظة أى تغير بيحصل حوالينا. لو اتعودنا على الشارع اللى بنعدى منه كل يوم، مش هناخد بالنا لو شجرة جديدة اتزرعت، بالأكتر مش بناخد بالنا لو اتشالت واتحول مكانها لكومة رمل حتى! علشان اتعودنا!

المعضلة التانية فى الحياة هى "التأجيل"، انه بما إن الحاجات والناس اعتدنا وجودهم واعتقدنا ان فيه ضمان لاستمرارية الوجود ده، فبقينا نأجل كل حاجة. نأجل حاجات عايزين نعملها فى حياتنا، يارب الحاجة دى حتى اننا نغير ترتيب شوية حاجات فى اوضتنا أو على مكتبنا، اننا ننقل حاجة من مكان للتانى! بقينا نأجل كل حاجة تحت شعار: "اللى متعملش النهاردة يتعمل بكره".

بقينا نأجل اننا نشوف بعض، لبكره وبعده وبعده لغاية ما بيجى يوم ونكتشف ان مبقاش فيه بكره للناس اللى اجلنا مقابلتهم! أو يمكن ميكونش فيه بكره لينا احنا شخصياً!

دى مش دعوة للإكتئاب، لكنها دعوة للإنتباه للحياة .. لاننا نعيشها بكل ما فيها ونحتفل بكل تفصيله فى يومنا وكأننا بننبهر بالأشياء للمرة الأولى! اننا نفتح عينينا على كل تغير بيحصل حوالينا سواء فى الأشياء أو الأشخاص. اننا نحتفل بميلاد الحياة كل لحظة وكل يوم. واننا منأجلش حاجة عايزين نعملها، إن جاز تعبير اننا نعيش ملئ الحياة.

تكلفة ده ايه؟ مش سعادة بس الحقيقة. لكن سعادة وألم، لأن زى ما نحتفل بميلاد الحياة هنحتفل بتوديع شوية حاجات أو اشخاص منها. بس هى صورة على بعضها لازم تتشاف وتتعاش.
اتمني أنا شخصيا افتكر كل يوم انى مأجلش احتفالى بكل تفاصيل الحياة، واعيش ملئ الحياة.

[Haia]

(( اغلب الحاجات إن لم يكن كلها مش مضمونة البقاء، وبالتالى تحتاج للإنتباه ليها مش الإعتياد عليها ))

[walaa farouk]

ميرسى على مرورك الغالى