الحياة في الحضور الإلهي

[walaa farouk]

لما بتبتدي تخرج برة دايرة حضور الله
وتبدأ تعيش في خطية أو حسب الجسد
بتبدأ تفقد كل شعور بالتدبير الالهي
وبتبدأ تشوف حياتك بمنظور بشري بحت

فبتبدي تخرج المشيئة الالهية من حساباتك
و تشوف كل الجروح و الصدمات والخساير
انها عشوائية و صدفة و كانت مسئوليتك
فبتبدأ تواجه الماضي بجروحه بالآمه لوحدك
فبتبدأ تخاف و تشك في كل شئ .

وحتي الناس بتبدأ تشوفهم بعين جسدية عالمية
وتشوف اخطائهم وعيوبهم وقد ايه هما ذئاب

علشان كدة خطورة الخطية
مش جنة ولا نار ولا سما وجحيم
ولا الخطية هي مجرد شهوة او زنا

الخطية بتبدأ لما بتبتدي تخرج من الحضور الالهي
وتعيش بحساباتك انت .. وانت اضعف بكتير من انك تقدر تعيش بالطريقة دي .

علشان كدة حافظ علي التواجد في حضور الله وحضن الاب
ويوم ما تضعف وتخرج .. قوم اصرخ لأبوك السماوي يستردك .. اتحامي واستخبي وسط مرشد روحي او جماعة قولهم خبوني في وسطكم عشان استرد حضور الله في حياتي من تاني ..

متروحش لرجال الله ترص خطايا تحت مسمي الاعتراف
لكن روح قول لابوك الروحي انا في عرضك انا واقع ساعدني استعيد قوتي في المسيح من تاني .

و بمجرد ما ترجع للحضور الالهي من تاني
ترجع الحياة لحياتك .. وترجع تشوف كل تفاصيل حياتك بعين الله و انه صالح جدا في كل عمله .. و تبدأ تشوف الخير والرحمة حتي في الفقدان والالم والصدمات .. و يرجعوا الناس لحجمهم الطبيعي مش حجمهم المخيف فتقدر تحبهم و تلتمس لهم العذر و تطلقهم أحرار لانك حر .