ما هو العمر المناسب للطفل لنعرفه بالله ؟

[Marina Greiss]

للأجابه على السؤال السابق أحب اوضح معلومات سمعتها من برنامج " يوم ورا يوم "

الرضيع فى ايامه الأولى بيعرف مامته من ريحتها وبيعرف الأب من صوته

والطبيب مقدم البرنامج قال ان الأب المفروض أثناء فتره الحمل يقرأ للجنين قصص علشان الطفل يحب القراءه وكمان علشان يتعرف أكتر على صوت الأب

هنا لفت نظرى حاجه أذا كان الجنين ممكن يسمع حكايات ألف ليله وليله وست الحسن و.......
يبقى أيه المانع أننا نكلمه عن ربنا وهو جنين ؟؟؟؟

( بس ياريت بلاش قصه الطوفان وسدوم وعموره علشان انا متعقده من نتيجتهم على الاطفال ) فى قصص مناسبه لكل عمر موجوده فى مكتبات الكنايس

قصه
قالت خادمه أنها فى فتره الحمل كانت اليوم اللى قبل ما تروح تتناول كانت بتربت على الجنين وتقوله أننا بكره هنتناول من جسد ربنا ودمه وعلشان كدا احنا صومنا وقبل المناوله كانت بالراحه تربت عليه الحاجه الجميله ان بعد الطفل دا ما نور الدنيا أنه مبقاش يعيط فى القداس وبيفضل هادى مع أن كل الاطفال بيزنوا !!!!!!!!!!

كمان واحده قالتلى انها من يوم ما عرفت ان ربنا هيديها بيبى قررت هى وزوجها أنهم يصلوا من أجله بصوت علشان يسمعوه الصلا وكانوا بيطلبوا أنه يبقى أبن لربنا ويعيش طول عمره فى مخافه الله وكمان كانوا بيكلموه وهو جنين عن محبه ربنا ليهم بأنه سمح وأعطاهم العطيه العظيمه دى

طب فى حد ممكن يقول دا بيبى يعنى هو هيفهم اللى بيتقال ؟؟؟؟؟؟؟؟

أنا معاك مش هيفهم كل اللى بيتقال بس المفروض نبسط المعلومات على أد ما نقدر بس ما نلغيش معناها يعنى مينفعش نقول أننا هنتناول عسل وفطير مثلا ( دى كارثه لوحدها )

كمان الطفل من كتر نقاءه بيبقى عنده أستعداد لقبول القصص والمعلومات الروحيه أكتر بكتير من أى شخص بالغ والدليل على كدا شوفوا أى طفل وهو بيبص لصوره المسيح أو لأى قديس هتشفوه كأنه بيتكلم مع شخص حقيقى هو شايفه وحتى لو الطفل لسه مش بيعرف ينطق صح هتلاقوه بيلاغى الصور اللى بيشوفها

وكمان تاريخ الكنيسه بيعلمنا كدا ..... لو سمعتوا عن شفيع الاطفال القديس " كرياكوس " هو أصغر شهيد اتعذب ومات على أسم المسيح وكان عمره 3 سنين ومش قتلوه كدا وخلاص مع أمه القديسه " يوليطه " لاء دول حرقوه وعذبوه وعرضوا عليه أنكار الأيمان وكان بعد كل تعذيب يقولهم

" بابا يسوع شفانى "

يعنى القديس العظيم دا كان ليه حياه وعشره وأختبار مع المسيح خلال عمره اللى 3 سنين

وكمان أكيد مامته كانت موصله له الايمان قبل ال 3 سنين

كمان

" كان يوآش أبن سبع سنين حين ملك وملك أربعين سنه فى أورشليم وأسم أمه ظبيه من بئر سبع , وعمل يوآش المستقيم فى عينى الرب كل أيام يهوياداع الكاهن " ( 2 أخ 24 : 1- 2 )

يوأش كان ملك على شعب عدده كنجوم السماء أو كرمل البحر طفل فى السابعه يحكم شعب !!!!
ومش بس كدا دا كمان كان يعمل المستقيم فى عينى الرب !!!!!!!!!!!

عرف منين طفل السابعه ما هو مستقيم فى عينى الرب !!!!!!!
جاب منين الحكمه اللى يقدر بيها يحكم على الشعب دا !!!!!!!
جاب منين النعمه فى عيون الشعب انهم يتبعوه !!!!!!!!!!!

( للمعلومه اللى ربى يوآش يهوياداع الكاهن ويبقى زوج أخته , لكن بعد كدا يوآش فسد للأسف لكن وهو كبير لكن العجيب أنه طول طفولته وبدايه شبابه كان مع الرب )

كمان عزيزتى الأم

" اذ أتذكر الايمان العديم الرياء الذى فيك الذى سكن أولا فى جدتك لوئيس وأمك أفنيكى ولكنى موقن أنه فيك ايضا " ( 2 تى 1 : 5 )

" لا يستهن أحد بحداثتك بل كن قدوه للمؤمنين فى الكلام فى التصرف فى المحبه فى الروح فى الايمان فى الطهاره " ( 1 تى 4 : 12 )

يعنى الايمان اللى زرعته أفنيكى ومن فبلها لوئيس ظهر بوضوح على تيموثاوس لكن الجميل ان تيموثاوس كان فى القامه الروحيه العاليه دى وهو فى الحداثه !!!!!!!!!!

كمان سمعت قصه
ان كانت طفله عمرها حوالى سنه نايمه مع مامتها وبعدين الام صحيت بالليل على البنت بتكلم صوره العذراء مريم ( وناسه عليها صوره العدرا بتنور ) وبتقولها بما معناه

( تعالى عدرا تعالى ) وكانت بتوسع مكان على الفراش للعذراء وكمان كانت بتخبط على الفراش جنبها على المكان اللى المفروض العذراء هتجلس فيه !!!!!!!!!!!!!!!!

أحب أقول بأن الزوجه اللى بتحب زوجها أول كلمه الطفل بينطقها هى " بابا "

فما بالنا باللى بتحب ربنا