إزاي نحب؟ نُصبر نتأنى.. نستأنَّى. نستَنَّى

[walaa farouk]

شكل قوي من أشكال المحبة، لكنه مش جذاب قوي. هو الصبر.
والـــ صَبر زي نبات الــ صَبّاركده (ونبات الصبّار سموه كده علشان بيصبُر على غياب المياه).
المحبة الحقيقية تُصبر على غياب الكلام والاهتمام لفترات طويلة.
مش للأبد، الصبّار برضه بيموت! لكن لوقت طويل. الــ صَبر يخلينا نُعذُر بعض ونحُط نفسِنا مَطرح الآخرين.

اللي ما اتَّصَلش مثلاً ومسألش، يمكن عنده ظروف (والظروف مش لازم ظروف خارجية
، مُكن ظروف داخلية. مكتئب. مش قادر يتكلم..مش قادر يقرب من أي حد.
طاقته النفسية قليلة. مش مستحمل حاجة).

الصبر يعني التأني قبل الكلام، ونشوف كلامنا طالع منين، ورايح على فين.
هل طالِع من المَصلحة أم من الغيرة، أم من الضيق، أم من الزهق
. أم من الرغبة في التفوق، أم من الرغبة في إثبات وجهة النظر الشخصية.

الصبر يحمي المحبة، والاندفاع يُمكن أن يؤذيها.
أكتر حاجة تأُذي المحبة، الاندفاع، وبالذات في الكلام: الكلام مع الآخر، أو عن الآخر (حتى في قلوبنا).

الصمت وترك الأمور والأشخاص بين يدي الله والوقت، بيخلينا نعرف نحب أكتر وأحسن.

إزاي نحب؟ نُصبر نتأنى.. نستأنَّى. نستَنَّى..