أحمد مجدي يروي تفاصيل وفاة صديقته المقربة
عبّر الفنان أحمد مجدي، عن حزنه لفقدان صديقته المقربة منة عبد الظاهر، كما عبّر عن اشتياقه إليها وإلى الاماكن التي جمعتهما سويًا.
ونشر أحمد مجدي صورة من خلال حسابه على "الفيسبوك"، وعلق عليها قائلًا:" وأنا في أولى حقوق كنت باجي أذاكر هنا في المعادي أيام الامتحانات، وكانت صديقتي منة عبد الظاهر بتيجي أحيانا تذاكر معايا مع أنها كانت في كلية تانية، وكنا طبعا ولا بنذاكر ولا حاجة! كنا بنقضيها كلام وحكاوي وقبل مانقوم نبص شوية في الورق والكتب ونمشي. بساطة المكان وهدوءه كانوا بيسمحولي بالتأمل وبمتابعة اللي بيحصل جوة المكان وبراه".
وتابع :"بعد فترة مش متأكد قد ايه، منة سافرت اجازة. وفي الطريق عملت حادثة وراحت المستشفى ودخلت في غيبوبة. كانت صدمة كبيرة جدا على الجميع. وخلال أيام كان خبر وفاتها. وكان أكتر خبر قاسي سمعته في حياتي. لكن فضلت ذكرى منة جميلة وطيبة".
واختتم قائلًا: "امبارح في عز العاصفة قررت انزل وماستسلمش للخوف اللي في البيوت. عديت بالصدفة من قدام المكان اللي عادة بتحاشى النظر اليه وركنت العربية ودخلت طلبت البتاعة امو قرفة اللي كنت باحبها. وقربت للمكان اللي كنا بنقعد فيه أنا ومنة حسيت كأني داخل اقعد معاها. وانبسط اوي ان المكان لسه زي ماهو الى حد كبير تحية لروحك المرحة الظريفة يا منة".
هذا الخبر منقول من : صدى البلد
