لأنه امين ومابينساش الصلاة

[walaa farouk]

بصلّيلك انك الرب يرحمك من كل سكة عجباك بس اخرها سد..
بصلّيلك تحافظ على طاقتك وشغفك وسط كل دواير بتسحب روحك وتطفيها بالبطئ ..

بصليلك ترجع تصدق في الفرح والتعويض بعد سنين ذُل مكنش فيها خير ..

بصلي كل احساس بالرفض والصِغَر والدونية الله يعالجه بناس يحبوك ويقبلوك زي ما أنت من غير تجميل..

بصليلك تتحرك بعد وقت طويل كان مليان عطلة وتأخير من غير اسباب..
بصلّي عينيك ترجع تلمع من الفرحة بعد وجع واحباط ودموع استنزفتها كتير ..

بصليلك تفوّق من دور الضحية اللي حابسك جواه لا قادر تتحرك ولا راضي بالوضع..

بصلي لواقع مختلف يتحقق بإيدك ولنعمة تلازمك في كل تحركاتك.
. وروح حياة من جواك يفرق فيك وفي اللي حواليك..

بصلّي لسيطرة وتحكم على افكارك اللي مبقتش تقدر تحكمها..
وهدوء وسط توهان وتخبط رؤيتك لكل حاجة..

بصلّي حضوره مايفارقكش ودفا وجوده يغطي كل عُري في نفسك سببوه الناس..

بصلّيلك يا صديقي وعارف انه هايستجيب ويغير الوضع.. لأنه امين ومابينساش الصلاة..