انا صغير بس عاملنى معاملة الكبار

[walaa farouk]

بص يا يسوع.. النهاردة كالعادة في نهاية سنة حقف قدامك مخزى
و مش عارف أودى وشى منك فين.. حشكرك على خير عطيته
ما استحقهوش و حعترفلك بكل خطايا نفسي اللى انا و انت بس عارفينها
و انت بس اللى ساترها.. حقعد اشتكيلك همومى زى العيال لما تروح تشكى لابوها.
بس سورى يايسوع مش حقدر اوعدك باى وعود.. لانى عارف انى غالبا ما بنفذش..
يعنى بلغتنا احنا عيل صغير مش راجل في وعودى..
و علشان انا صغير حتجاسر و اقولك على الاقل عاملنى معاملة الكبار..
ماهو الكبار اللى هم كبار انت سامحتهم و غفرتلهم و خليتهم معاك في فردوسك.
. قوم حتيجى ع الصغير؟!! بص يايسوع انا عاوزك تعاملنى معاملة الكبار في غفرانك .
. معاملة ادم الكبير اللى غلط و فديته و كل نسله و نوح الكبير اللى اتعرى و سترته
و داود الكبير اللى زنى و سامحته و أيوب الكبير اللى اتفاخر و فهمته و رجعتله مجده..
و لوط الكبير اللى انذل في سدوم و عمورة و انقذته
و يعقوب اللى عاشها بتحايل و مكر و في الاخر اترمى عندك و سميته إسرائيل
و دخلت معاه في عهد.. و ابراهيم ابو الآباء اللى خاف و كذب و انت ما سبتهوش الا بابن الوعد
.. و سليمان الكبير اللى مشى ورا زوجاته و بخر للاوثان بس توبته في آخر أيامه..
و إيليا الكبير اللى خاف من ايزابل و يئس و اشتهى الموت
و رديت ليه روحه و شمشون اللى اترمى في شهوته و ضاعت قوته على حجر دليلة
و رجعتهاله و ما هلكش .. و يونان اللى اتمرد و هرب و رديته و راضيته..
و بطرس الكبير اللى انكر و قبلته و بولس الكبير اللى اضطهدك و كنيستك
و قاومك و اقتنيته و اغسطينوس اللى فضل عايش لنفسه و فكره
و افتقدته و موسي الأسود اللى ما فيش غلط ما عملهوش بس عرفت تدخله الشبكة.
. و غيرهم من الكبار و اللى انت شايفهم كبار و فضلوا في عينك كبار...
كل الكبار دول غلطوا ووقعوا و منهم اللى فضل سنين في خطيته و انت ما صغرتهمش
و عاملتهم كبار و خليتهم كبار.. فمابالك الصغير اللى زى حالاتى
طب الكبير و رحمته كده امال الصغير قليل الحيلة تقسي عليه و لا ترحمه اكتر .
. انا بقة حقولك عاملنى على الاقل زيهم..
مش لانى زيهم لكن لان اذا كانوا كبار كده و غلطوا
و كان ممكن يضيعوا لكن لحقتهم و ما اقمتش ليهم خطيتهم.
. قدرت محبتهم.. اهو بقة انا الحاجة الوحيدة فيا و اللى فيها زيهم انى بحبك..
صحيح مش بقوة محبتهم ليك و لا إيمانهم.. بس برضك بحبك و انت عارف
.. صغير اه بس حقولك لو سمحت كبرنى.. عاملنى زى الكبار.
. مش حوعدك اكبر لكن حصليلك تكبرنى.. تكبرنى في محبتى
و تكبرنى في غفرانى و تكبرنى فوق خطيتى و شهوتى و تكبرنى في فهمى لدنيتى
.. و تكبرنى فوق ضيقتى ووجعتى.. و تكبرنى فوق وقعتى و سقطتى
و تكبرنى فوق احتياجاتى و ماديتى و تكبرنى فوق احزانى و قلبة سحنتى كبرنى ببسمتى
.. كبرنى و خلى ليا رسالة مش زى ما جيت زى ما مشيت ياحسرتى..
صغير اوى انا بس لو حبيت تقدر تكبرنى و لما اجيلك تشاور لهم يدخلونى.
. و تقولهم برحمتك سيبوه.. ده ملكيتى..
و ما تنساش حبايبي و اخواتى و بيتى و اللى بحبهم من قلبي.
. دول يارب اوع تصغرهم كبرهم برضك دول عزوتى