الالم وتعويضات الله

[مورا مرمر]

فيه قصة منتشرة اليومين دول علي الفيسبوك عن واحدة ست اسمها Loriف أمريكا كان عندها ٣ أطفال بنتين وولد..وف يوم اتعرضت لحادثة عربية لوري خبطتها ولما فاقت عرفت أن البنتين اتوفوا والطفل كان brain dead ولازم تروح تودعه..بعدها بسنة تقريبا الست دي حملت وجابت ٣ توائم..بنتين وولد برضو..
القصة شدتني جدا..كنت عايزة اتأكد أنها حقيقية وأعرف تفاصيل اكتر..فضلت ادور لحد ما وصلت لblog بتكتب فيها الأم كل تجربتها المؤلمة جدا..
البلوج اسمها " not my life..it wasn't supposed to be that way "
اسم البلوج لوحده عبقري..كل واحد فينا عنده حتة ف حياته مشيت عكس ما كان متوقع..lori عمرها ما تخيلت أنها تفقد كل أولادها ف يوم..فجأة!
من ضمن الحاجات اللي هي كتبتها وبهرتني..كان بوست اسمه "الخوف" وبتقول فيه أنها حتي بعد مرور ١٠ سنين علي الحادثة، لسة ذكري اليوم دة بكل تفاصيله مؤلمة ألم شديد جدا..وأنها طول ال١٠ سنين كان ساعات ال٣ توائم يوم ذكري الحادثة كل سنة يشغلوا فيديوهات للاطفال اللي انتقلوا، وهي كانت بتخاف تتفرج..
عشان كانت حاسة ان ذكراهم جواها بتقل..بدأت تنسي تفاصيلهم الصغيرة..ودة كان واجعها لأنها عايزة تفضل فاكرهم كويس..
لكنها ف يوم لما أدركت أن الخوف محاصرها، قررت تواجه وراحت تتفرج معاهم علي الفيديوهات..
ف الأول كان مؤلم جدا لقت عينيها بتدمع لوحدها..بس بعد شوية بدأت تضحك لما افتكرت شقاوتهم..لدرجة انها مكانتش عايزة توقف فرجة..
وبعدين كتبت الجملتين دول بالنص:
I knew that i could keep watching their videos over and over again, but i know that i need to live in my life today..my "new normal " as we call it..it doesnt mean that i love them any less, it means that i know myself..i know that if i keep watching the videos, i would drown myself back into wanting my old life back and start comparing the two lives again..
أنا كان فارق معايا ادور ورا القصة دي بالذات عشان كنت متشوقة اعرف الست دي ازاي قدرت تواجه الوجع الرهيب دة..وكنت عايزة اثبت لنفسي حاجتين...
تعويضات الله طبعا معزية، لكن الألم مش بيختفي..رغم أن بقي عندها ٣ اولاد تانيين لكن فضلت شايلة وجع كبير جواها..وجع كبير جدا فضلت تشتغل عليه ١٠ سنين بعد الحادثة حتي وهي معاها ٣ أطفال تانيين!
والحاجة التانية بقي الأهم هي انها ازاي عرفت تتعامل صح مع وجعها.. عرفت تفهم نفسها و تفهم ان مهما كانت الخسارة مؤلمة، الاختيار لسة ف أيد الإنسان..يواجه ويعافر ويقبل الألم ويقبل الحياة الجديدة ولا يرفض ويكتئب ويفضل متبت ف وجع وذكريات الماضي..
واحدة من أهم مهارات الحياة اللي ربنا حطها فينا هي القدرة علي أنك تقوم وتكمل..وانت موجوع..
let it Go..
.let the Pain Go..

[walaa farouk]

مشاركة جميلة
ربنا يفرح قلبك

[Mary Naeem]

ربنا حطها فينا هي القدرة علي أنك تقوم وتكمل..وانت موجوع

صح الكلام
ربنا يباركك