كيف لي ان اشفي من حبك ،، من يداوى جرح شوقي إليك ..
جمله واحده بتوصف حياتي معاك ، حبي ليك بقي شبه اتنين مرتبطين انتهت بينهم مرحله الاندهاش واللمعان و ابتدو يحاربوا من أجل البقاء سويآ
= انا مش عارفه اخف من حبك او ماينفعش اخف منه ، ورغم كل اللى جوايا من قبيل
" ليه حصل كدا ، ليه ادتني وعلقتني مادام هتاخد ! ، ليه بقابل ناس انت عارف انهم هيمشوا ! ، ليه بتخليني احب ناس بتأذيني ! ليه خلقتني بصدق بسرعه و بيضحك عليا كتير ! ، ليه ماليش صحاب ! ، ليه خلقتني ف جو أسرى عنيف ! ، ليه من صغرى حاططني ف تجارب ! "
كل دي اسئله ف دماغي تلقائي بحس انك بتعمل كدا معايا عشان بتأذيني ، و المفروض اني ابعد عن اي علاقه بتأذيني ، الا علاقتي بيك مش عشان مصدقه ف جمل " كل اللى بتعملو خير ليا ، وانك ادرى بمصلحتي "
لا عقلي مش بيقبل كدا و طبيعي المفروض اخسر علاقتي بيك لانى حاسه انك بتأذيني و بتضغط عليا و ع طول حاططني ف مشاكل و عمرك ماادتني حاجه سهله !
بس انا ما بقدرش اعمل كدا !
عشان انا فعلا بحبك ، عارف لما اب يضرب بنته واول ماتدمع ياخدها ف حضنه
وقتها هي بتعيط منه بس ف حضنه !
دا حالى معاك ، اقولك الحقيقه !
جربت اعيط ف حضن ناس غيرك فرموني وانا بعيط !
كشفتلهم وجعي ماحدش غطاه ، ماحدش طبطب
ف من كتر ماجربت بني ادمين عرفت قيمتك
لجأت ليك من كتر ما ابتليتني ف كل اللى قلبي اتعلق بيهم
زي ماتكون بتقولى " ماينفعش قلبك يحس بالنجاه والأمان غير ف قلبي لأنه هو الامان الدائم فعلا "
انا خلاص اتعلمت الجمله دي
بس انا مجروحه منك يارب !
مش غلط ومش عيب اني اقولك كدا
ومش كل العقول هتستوعب علاقتي بيك
بس انت بتديني ف اقلام ع وشى .. كلها تجارب صعبه عليا ، و بتعلم ف قلبي بالجامد ،
اه كل التجارب فهمت هدفها كان ايه بس كل تجربه خدت جزء من قلبي !
يرضيك قلبي بقي شبه واحد اتحرق .. الحريق اختفي بس جلده كله تشوه !
بتزود تشوهاتي ليه بزياده !
المفروض اني خلاص شخصيتي بقيت اقوي و انضج مش عايزه تجارب تبقي دروس تاني
ليه مافيش حاجه سهله !
ممكن تحسبلي كل المعافره اللى قبل كدا مع كل الناس اللى مايستاهلوش ، وتبعتلي حاجه تكون مكافئه نهايه المعافره !
= عارف لما بتعملى حاجه حلوه وسط الضيق بحس انك بتصالحني ومش بيهون عليك زعلي فعلا
بس اكتشفت انك بتثبتني يارب !
سامحني بس حسيتك شبه اب بيضرب ابنه
ولما الطفل يشتد عليه الوجع و ينهار عياط
يقوم يحضنه ، فيهدي ، ف اول مايهدي يكمل عليه ضرب تاني !
نفس الحال تبعتلي حاجه تهديني من الم التجربه و بمجرد اني اهدي هوب الاقيني ف التجربه الاصعب منها
= معقول تكون قاسى بالمنظر دا !
ماعتقدش انى اهون عليك صح !
كنت بنجرح من البشر بلجأ ليك ، لما انجرح منك اروح لمين !
من يداوى جُرحَ شوقي إليك يا الله !
= كل ما بتعمق ف علاقتي معاك الأمور بتزداد سوء و تعقيد و بتلخبط طول مانا ببحث عن حقيقه اهدافك وأسباب التجارب المبعوته منك !
= علاقتنا مش سهله والبقاء معاك رغم كل الضيقات اللى انا حاسه انها منك أمر يكاد يكون مميت
= انا أشبه لشخص عايم ف محيط هايج جدا بيخبط ، موجه عالي بس بيعوم فيه عشان متأكد أن النجاه ف أنه يوصل و يخلص عوم
وأنه كان ممكن يختار طريق اسهل من المحيط بس النجاه ف الطريق دا ، لأنه لما يوصل للشط التاني هيبقي وصل لبر الامان !
= انا متاكده ان النجاه معاك وف طريقك بس الطريق صعب و التخبيط صوته عالى و عقلي تعب من كتر التفكير ، وقلبي معادش فيه حيل للمعافره ف سبيل الوصول !
ومع ذلك مش قادره استغني عنك !
عارفه أن طريقتي صعبه وان كلامي يكاد يكون قاسى ع مسمعك بس
انا ماليش غيرك ، مزعلني فعلا بس بحبك !
واخده ع خاطرى جامد بس اروح لمين غيرك !
لسه فيه فتيل جوا قلبي بينور و بيقولي أنه كلما اشتدت الرحله النتيجه هتبقي مرضيه
ارجوك هذا الفتيل كاد ينطفئ داخلى أنقذه لتنقذ قلبي معه ، ولا تسمح للتجارب ان تمس ايماني بك ، ماتخلنيش اهتز يارب !
عارف لما تبقي رياح و عواصف شديده و مع ذلك ايديا ماسكه ف طرف الشباك كي احافظ ع ثباتي ضد الريح !
انا ماسكه فيك لاخر لحظه رغم كل التلطيش ، رغم أن قلبي داب من كتر مابعتلي تجارب دروس
= عارف الخناق معاك مفيد ، كل المجادلات معك باتت بالنفع ، بحس روحي بتتعلق بيك اكتر ، رغم اني مش بفهم بتعمل معايا كدا ليه ! بس بمجرد ما بسألك كل اللى الاسئله اللى جوايا ، بحس براحه نسبيآ ،
= واخيرآ انهي المجادله معك بالانتظار ، ككل جدال بيننا ، تنتظر نفسى مراضتك لها ، تنتظرك ألا تنساها !
= مع فجر كل يوم جديد بتمني انك تنهي الجرح ، تنهي المهزله ، توقف النزيف ، ماتبعتليش تجارب صعبه تاني ، تمنع اي حد مؤذى أنه ياخد قلبي ، انا بسلمك انت السيطرة ، سيطر و اتحكم ف مشاعرى وأفكارى لاني جاهله بالأمر دا و لا أجيد التصرف الحكيم ف تلك الأمور ،
مستنياك تداوى ثم تطبطب ثم اسكن ف هدوء دائم ف قلبك فقط لا شئ أكثر من ذاك ..!
= ألا ينسى الله قلبآ بات متعشمآ به !
" وانتظر مع الفجر وجهك ، أنشد لك مع القديسين "
