انخدعت فيك

walaa farouk · رقم المشاركة : ( 1 ) 29 - 07 - 2019, 10:44 PM

اصل مش اول ما دخل البيت اتخطبتي و يومين و اتجوزتي ..
و انت مش اول ما جت عينك عليها لقيت نفسك في الكنيسة بتكلل ..
الصراحة كلنا مسئولين عن اختياراتنا و خصوصآ قرار مهم زي الجواز ..
فبلاش نقول اتخدعنا في بعض ..
اصله طلع بيشتم .. اصلها طلعت بخيلة
اصله طلع بيشرب .. و اصلها طلعت ودنها لامها

و الخطوبة كان فيها ايه ؟؟ فجأة بقي بيشتم ؟
اصل الشتام لسانه كده مش هيعرف يتصنع.
و اللي بيشرب هيبان و طالما خدتيه بسيجارة توقعي اي حاجة براحتك
( طبعا في بيدخنوا و كويسين اخلاقيآ لكن بتكلم علي المبدأ ).
و طالما مش بتديك مشاعر يبقي هي بخيلة..

لكن احنا بنحب نسكن ..
اصل بعد الجواز هيتغير / هتتغير ....
ازاي و ايه الدافع؟؟ فين الدافع للتغيير ما انتوا اتجوزتوا ؟؟

نرجع للخطوبة .. بتعملوا فيها ايه ؟
ده من تالت او رابع تعامل مع اي شخص بنبدأ نكون صورة عنه ..

اقولك ايه اللي حصل؟
انتوا كل واحد فيكم خاف و عمل مش واخد باله ..
انتي خفتي تفكي .. و اهلك اقنعوكي .. و سمعتي اصحابك ..
هوب بقيتي في الاكليل بدون اقتناع و ماشية في الزفة
بعدها لبستي في طباعه اللي بتكرهيها فبتقولي انخدعت.

و انت قولت اهي عروسة و السلام و انا هدبحلها القطة خلتك تكرهه نفسك و عيشتك ..

بلاش تخافوا تقولوا لا .. لا مش هنكمل .. لا مش مرتاحين .. لا مننفعش لبعض .. لا مش موافقة
لا غصب عن اي حد .. لان دي حياتي هعيشها مرة
فبلاش تكون عذاب ابدي ارضي ..

Mary Naeem · 30 - 07 - 2019, 10:41 AM

بلاش تخافوا تقولوا لا .. لا مش هنكمل .. لا مش مرتاحين .. لا مننفعش لبعض .. لا مش موافقة
لا غصب عن اي حد .. لان دي حياتي هعيشها مرة
فبلاش تكون عذاب ابدي ارضي

صح الكلام
ربنا يباركك

walaa farouk · 01 - 08 - 2019, 12:56 AM

ميرسى على مرورك الغالى انخدعت فيك