قديسين عايشين وسطينا
بتقولي مافيش في البيت غير خمسة جنية ، حطتها على الترابيزة وقلت هروح الصبح أشتري بيها عيش ، وإن كان على الأكل يبقا يدبر بأي حاجة ، أنا عندي شوية بطاطس في البيت ..
وفيما هى تقلب الأمور في رأسها سمعت حد بيخبط على الباب ، فتحت الباب لقت جارتها بتقولها : البيت مافيهوش ولا قرش ، ألاقي معاكي خمسة جنية سلف ، وبدون تردد قالت لجارتها : أيوة في يا حبيبتي ، لحظة واحدة أجيبهالك ، ودخلت جابت الخمسة جنية بتاعة العيش وإديتها لجارتها !!
ولما قفلت الباب إبنها قال لها : أيه يا امي إللي عملتيه ده ، أنتي إديتي لجارتنا أم فلان الخمسة جنية بتاعة العيش ؟
= طبعاً يا ابني ، ماهى طلبتها وبتقول مافيش في البيت ولا قرش ..
- طيب ما احنا برضوا مافيش في بيتنا ولا قرش ..
= أحنا ربنا هيدبرهالنا وهيبعتلنا خمسة جنية غيرها ، لكن هى لجأت لينا وخبطت على بابنا ومكانش ينفع نقولها مافيش ..
- طيب هيدبرها إزاي يا أمي ، ده الدنيا ليل واحنا في قرية ، وأنتي بتروحي الساعة ستة الصبح تجيبي العيش ، يبقا الفلوس هتيجي إزاي بس !!
= ماتخافش يابني ربنا هيبعت
نامت السيدة مطمئنة ومتكلة على الرب تماماً ، وصحيت الساعة الخامسة صباحاً ووقفت قدام صورة المسيح وقالت له : مافيش عيش في البيت خالص وكمان مافيش فلوس وأنا قلت للواد انك هتدبرها وأنا بروح الفرن الساعة ستة الصبح ودلوقتي الساعة خمسة ، فين فلوس العيش يارب ؟
بتقولي : أنا قعدت أشاور للمسيح في الصورة وأقوله فين فلوس العيش ؟؟ والساعة ستة بالظبط لقيت الباب بيخبط ولقيت جارة مابتجيش عندي خالص وخاصة في ساعة بدري زي كدة ، وبتقولي سامحيني يا حبيبتي أنا نسيتك خالص
سألتها نسيتني إزاي ؟ قالتلي أصل بنتي إللي في أمريكا ربنا رزقها بثمرة البطن وأنتي عارفة انها مكانتش بتخلف وقالتلي من شهر فات ، وزعي خمسين جنية على كل أرملة في البلد ، وأنا وزعت على الكل ونسيتك أنتي ، وإمبارح بليل ربنا فكرني بيكي ، فقلت لازم أجيلك الصبح وإدهالك ، سامحيني يا حبيبتي وخدي الخمسين جنية دي !!
دخلت السيدة وأغلقت الباب ووقفت قدام صورة المسيح وقالتله : أنا قولت للواد انك هتدبرها ، بس قلتله انك هتبعتلنا خمسة جنية ، تقوم أنت يا حبيبي تبعت خمسين !.
