ح يسجنك

[walaa farouk]

مش عارف يرد عليك ، لأن كلامك جارح ، ما بتسمعش،
ما بتحسش باللي بيقوله، بتقاطعه و تستهون بمشاعره ..
يكلمك ما تفهموش، يحكي لك اللي مضايقه ما تهتمش ،
يسأل عليك و لا يفرق معاك .. حتي لما يعاتبك تقلب اللي فيك عليه و تطلعه هو اللي غلطان..
اللي همك نفسك ، و عاوزه اخدم مصلحتك و بس ..

عارف ايه اللي بيحصل مع اللي بتعمل معاه كده؟؟

اللي مش عارف يحبك و لا يسامحك و لا يعاتبك ح يدخلك سجن عقله غصب عنه و عنك
. ح يقفل عليك و يحدد إقامتك و ينساك هناك..
ح يطلعك بس لما الضرورة تفرضك عليه في مقابلة أو مناسبة..
ح يبتسم لك غصب عنه ، و يسلم بإيده من غير قلبه ،
و ح يعاقبك انه يطلعك من حساباته ..

انت اللي عملت في نفسك كده ؛ عزلتها، و حرمتها من حب الناس..

و شوية شوية ناس كتير ح يسجنوك لغاية لما تلاقي نفسك لوحدك، محروم من حبهم..
يمكن يعرفوك بس لما يحتاجوا منك حاجة، و ده عمره ما ح يخليك لا محترم و لا مبسوط ..

لو عاوز تخرج من سجنك، بابه موجود : حب من قلبك الكل و احترم الصغير قبل الكبير ،
و ادي مشاعر و اهتمام و تقدير ، و اسعد اللي حواليك من قبل ما يطلبوا
و لا يشحتوا منك الاهتمام و الاحترام ..